Rrëfimi i kadetes së parë nga Shqipëria që diplomoi në FSK dhe mori çmimin e kadetes më të dalluar

Krenare që është pjesë e “Ushtrisë së Paqes dhe Stabilitetit” dhe me vullnet të madh për të mbrojtur kombin shqiptar, kadetja e parë nga Shqipëria, Lirza Dollomaja e cila diplomoi sot në kazermën ”Adem Jashari”, si kadete e Forcës së Sigurisë së Kosovës, u shpërblye edhe me çmimin e kadetes më të dalluar të gjeneratës 2020.

Në ceremoninë e mbajtur sot ku diplomuan 15 kadetë të Forcës së Sigurisë së Kosovës, me të marrë çmimin, ajo para të pranishmëve mbajti një fjalim, ku tha se ushtria e Kosovës është vendi ku bashkohen për qëllimin madhor të mbrojtjes së kombit.

“Sot po bëhemi oficer në ushtrinë e paqes dhe stabilitetit, ashtu siç na mësuan prindërit dhe gjyshërit, një shkollë jete ku jo vetëm trajnohesh, shpërblehesh apo edhe ndëshkohesh, ky është vendi ku bashkohet çdo trevë, çdo gjini e çdo karakter, për të vepruar si një trup i vetëm, për një qëllim më madhor, mbrojtjen e kombit”, tha Dollomaja.

Kadetja Dollomoja tha se pret që ta kthen shumëfish gjithçka që ka mësuar, në atë vend ku do të shërbej.

Ajo u shpërblye me çmimin e kadetes së dalluar, çmim ky të cilin ajo e sheh si privilegj, ndërsa tha se ndjehet e nderuar që është kadetja e parë ndërkombëtare që diplomon si kadetja më e dalluar në Forcën e Sigurisë së Kosovës.

“Pres që nga ajo që kam mësuar këtu ta rikthej dhjetëfish aty ku do të kthehem të shërbejë në vend. Shpërblimi si kadetja më e mirë ishte diçka që nuk e kam pritur, ndihem shumë e privilegjuar, është një nder për mua të jem edhe kadetja e parë që diplomon prej akademisë së Kosovës edhe e para kadete ndërkombëtare që diplomon si kadetja më e dalluar”, u shpreh Dollomaja.

Në kazermën ”Adem Jashari”, sot u diplomuan 15 kadetë të Forcës së Sigurisë së Kosovës, gjenerata 2020. Ku përveç kadetes së dalluar, Lirza Dollomoja, në mesin e oficerëve të rinj, ishte edhe djali i vëllait të Ramush Haradinajt, Luan Haradinaj. /Telegrafi/