Autobusi i braktisur në Alaska largohet me helikopter – për ta vizituar, njerëzit rrezikonin edhe jetën

Një autobus i braktisur në Alaska i paraqitur edhe në filmin “Into The Wild” është larguar nga aty, pas rritjes së numrit të turistëve të cilët janë përballur me vdekjen dhe rreziqe, në tentimin për ta vizituar atë.

Sipas mediave të huaja, përcjell Telegrafi, ka qenë një helikopter i ushtrisë amerikane që e barti atë nga një shteg jashtë Parkut Kombëtar Denali.

Dhe sipas kryetarit të bashkisë lokale, ky ishte një “një lehtësim i madh”.

Kjo pasi që, siç bëhet e ditur, dy njerëz janë mbytur në lumenj gjatë rrugës për në ose nga autobusi dhe shumë më tepër u desh të shpëtoheshin.

Bëhet fjalë për autobusin i cili në vitin 1992 ishte i banuar nga aventurieri 24-vjeçar Chris McCandless, i cili përfundimisht vdiq nga uria.

Historia e tij u tregua nga autori Jon Krakauer në librin e vitit 1996 “Into The Wild”. Ndërkohë në vitin 2007 libri u përshtat në një film të drejtuar nga Sean Penn.

Komisioneri i Burimeve Natyrore të Alaska, Corri Feige tha se zyrtarët e kuptuan “rëndësinë e këtij autobusi në imagjinatën popullore”.

Sidoqoftë, sipas tij, ky është një automjet i braktisur i cili “po rrezikonte jetën e vizitorëve”.

Autobusi ishte vendosur thellë në Alaskan qendrore, rreth 50 kilometra nga qyteti më i afërt dhe për të arritur deri te ai, vizitorët duhej të kalonin lumin Teklanika.

Vitin e kaluar një grua e porsamartuar nga Bjellorusia u mbyt duke provuar të kalonte lumin e fryrë. Mbytja tjetër u bë në vitin 2010.

Në prill, një brazilian i bllokuar duhej të evakuohej dhe në shkurt pesë italianë u shpëtuan, me një që vuante nga një ngrirje e rëndë.

Në këtë drejtim, shtohet se shteti ndërmori 15 operacione kërkimi dhe shpëtimi të lidhura me autobusin midis 2009 dhe 2017, thonë autoritetet.

Kryetari i bashkisë së Denali Borough, Clay Walker i tha Reuters se autobusi ishte bërë një “tërheqje e rrezikshme” me të cilën duhej të merrej dikush.

“Në të njëjtën kohë, ajo është pjesë e historisë sonë dhe është paksa e hidhur të shohësh një pjesë të historisë sonë të zbresë në rrugë”, tha ai.

Autobusi i viteve 1940 u soll në shtegun e largët rreth 60 vjet më parë nga një ekuipazh rrugor, tha z. Walker.

Nuk është e qartë se çfarë do të ndodhë tani me autobusin. Autoritetet e Alaskan thanë se do të mbahej në një “vend të sigurt” derisa të merret një vendim. /Telegrafi/