​OKB: Pandemitë janë rezultat i shkatërrimit të natyrës nga njeriu

Pandemitë si ajo e coronavirusit janë rezultat i shkatërrimit të natyrës nga njeriu, thonë liderët në Kombet e Bashkuara, OBSH dhe WWF International, dhe bota, ka injoruar këtë realitet të zymtë prej dekadash.

Tregtia e paligjshme e jetës së egër si edhe shkatërrimi i pyjeve dhe vendeve të tjera me natyrë të egër, janë faktorët kryesorë që qëndrojnë pas rritjes së numrit të sëmundjeve që kalojnë nga kafshët e egra te njerëzit.

Ndërkohë, organizatat, bëjnë apel për një ringritje të gjelbër dhe të shëndetshme nga pandemia e Covid 19, në mënyrë të veçantë duke reformuar mënyrën se si menaxhohen fermat e të mbjellat dhe dietat e papërshtatshme.

Në një raport të WWF, të publikuar të mërkurën, paralajmërohet se rreziku i një sëmundjeje të re që kalon nga kafshët e egra tek njeriu, në të ardhmen, është më i lartë se kurrë, me potencialin për të shkaktuar kaos në shëndetin, ekonomitë dhe sigurinë globale.

Të gjithë qeverive të botës i kërkohet ndërkohë hartimi dhe zbatimi i ligjeve për të eliminuar shkatërrimin e natyrës dhe publikut i kërkohet po ashtu të ndjekin dieta më organike.

Sipas raportit, 60-70 për qind e sëmundjeve të reja që janë shfaqur te njerëzit që nga 1990, vijnë nga bota e egër.

Në të njëjtën periudhë, 178 milionë hektarë pyje janë prerë, hapësirë kjo shtatë herë më e madhe se Britania.