Vazhdon dhuna në qytetet amerikane, plagosen katër policë në Saint Louis – dy tjerë goditen nga një veturë në New York

Protestat e dhunshme në SHBA janë duke vazhduar, që kur javën e kaluar afro-amerikani George Floyd ndërroi jetë derisa policia po e arrestonte, ku njëri prej tyre ia vendosi gjurin në qafë dhe e mbajti për disa minuta me fytyrë për asfalti.

Siç raporton BBC, kanë ndodhur disa sulme ndaj policëve amerikanë nga ana e protestuesve të dhunshëm, transmeton Telegrafi.

Katër policë janë plagosur gjatë të shtënave me armë në Saint Louis, të cilët me urgjencë janë dërguar në spitalin më të afërt për tretman.

Gjithashtu është bërë e ditur, se gjendja e tyre shëndetësore është stabile dhe se plagët e marra nuk ua rrezikojnë jetën.

Në anën tjetër, policia ka konfirmuar se po vazhdojnë të shtënat në qendër të qytetit, duke mos specifikuar se nga kush po shkrepen plumbat.

Përveç kësaj, dy policë janë lënduar në Buffalo të New Yorkut, ata janë goditur nga një veturë të hënën mbrëma, e njëri prej tyre është konfirmuar se është në gjendje të rëndë shëndetësore.

Kryetari i New Yorkut, Bill de Blasio ka qenë në Bronx, kurse në Twitter ka njoftuar se ekzistojnë probleme të natyrave të ndryshme nëpër rrugët Fordham Road dhe Burnside Avenue.

Demonstruesit në Capitol Hill në Seattle kanë gjuajtur gurë në drejtim të policëve, duke mos i kursyer edhe nga shishet e xhamit e mjetet e ndryshme piroteknike, duke tentuar të thyejnë kordonin e policisë. /Telegrafi/