Kurti e Daka bisedojnë për mbajtjen e zgjedhjeve në Podujevë

Kryeministri në detyrë i Kosovës, Albin Kurti ka pritur sot në takim Kryetaren e Komisionit Qendror Zgjedhor (KQZ), Valdete Daka, me të cilën ka biseduar për mbajtjen e zgjedhjeve për kryetar të Komunës së Podujevës.

Zyra për Komunikim Publik e Kryeministrit ka njoftuar se në këtë takim u diskutua për funksionimin e këtij institucioni dhe ngritjes së bashkëpunimit në çështjet që ndërlidhen me Qeverinë.

Në takim është thënë se, ndonëse në kohë pandemie, KQZ është e gatshme të ushtrojë autoritetin e saj publik institucional.

“Daka e njoftoi kryeministrin në detyrë, Kurti, që përgatitjet për zgjedhjet për kryetar të komunës së Podujevës edhe pse janë ndërprerë, me vendimin e marr më 14 mars të këtij viti, një ditë para mbajtjes së zgjedhjeve, për mos-mbajtjen e tyre, KQZ është e gatshme që ta mbajë këtë proces zgjedhor”, thuhet në njoftim, përcjell Telegrafi.

Kurti e ka njoftuar Dakën për lirimin e masave që po i ndërmerr Qeveria ndaj COVID-19. “Koordinimi ndërinstitucional dhe respektimi i rekomandimeve të Institutit Kombëtar të Shëndetësisë Publike dhe Ministrisë së Shëndetësisë nga qytetarët, kanë dhënë rezultatin e tyre”, ka thënë ai.

Kryeministri në detyrë Kurti në këtë takim shprehu gatishmërinë e tij dhe të Qeverisë për forcimin e bashkëpunimit me KQZ-në dhe nevojën që ka vendi ynë për zhvillimin demokratik të institucioneve përmes transparencës dhe pavarësisë së tyre. /Telegrafi/