“Presion ndaj SHBA-së dhe evropianëve”, Irani lëshon satelitin e parë ushtarak në hapësirë

Irani ka nisur një satelit ushtarak në orbitë në një veprim që ka të ngjarë të rritë tensionet me SHBA-në në lidhje me programin bërthamor të vendit.

Në një deklaratë në faqen e saj të internetit, Garda Revolucionare e Iranit tha se lëshimi ndodhi nga shkretëtira qendrore e vendit dhe se sateliti kishte arritur në një orbitë prej 425 kilometra mbi sipërfaqen e Tokës.

Sateliti është quajtur “Noor” – që do të thotë “dritë” – dhe u përdor një transportues satelitor Ghasad për ta hedhur në hapësirë, një sistem që më parë ishte i panjohur, raportoi AP.

Sipas Euronews, përcjell Telegrafi, Departamenti amerikan i Shtetit dhe Pentagoni nuk iu përgjigjën menjëherë një kërkese për koment.

Por lëshimi vjen në mes të tensioneve me Uashingtonin pas prishjes së marrëveshjes bërthamore iraniane dhe pas një sulmi me dronë amerikan nga ku u vra gjenerali iranian Qassem Soleimani në janar.

Michael Horowitz, kreu i inteligjencës në LeBeck International, i tha Euronews se nisja ishte një përparim i rëndësishëm për Iranin, duke pasur parasysh përpjekje të dështuara të fundit.

“Uashingtoni ka të ngjarë të vëzhgojë këtë zhvillim nga afër: Programi hapësinor i Iranit është i lidhur ngushtë me atë të raketave dhe bërthamor. Nëse Irani është i aftë të nisë satelitët e rëndë ushtarakë, ai mund të jetë në gjendje të montojë edhe koka bërthamore në raketa ndërkontinentale”.

“Unë mendoj se kjo dërgon një mesazh të qartë dhe është pjesë e përpjekjes së Iranit për të bërë presion në Uashington dhe tek evropianët pas tërheqjes së SHBA-së nga JCPOA”. /Telegrafi/