Vdes albanologu Gianni Belluscio

Profesori i Universitetit të Kalabrisë, albanologu i shquar arbëresh, Gianni Belluscio, ka vdekur të dielën në Cosenza, në moshën 58-vjeçare.

“Giovanni Mario Giacomo Belluscio ka qenë mjeshtër i fonetikës eksperimentale dhe ka realizuar një sërë punimesh me vlerë për fonetikën e shqipes. Si mjeshtër i punës studimore në terren, kërkimet e tij i ka përqendruar në studimet dialektore, veçanërisht të arbëreshëve të Italisë, në fonetikën eksperimentale të aplikuar mbi shqipen dhe të folmet arbëreshe, por edhe në leksikologji dhe leksikografinë e shqipes, sociolinguistikë si edhe analizë teksti lidhur me konkordancat elektronike të teksteve letrare shqipe”, thuhet në njoftimin e Universitetit të Prishtinës.

Belluscio, ndër tjerash, ka shkruar për realizimet fonetike të spikerëve në radiot e Kosovës dhe të Shqipërisë.

Në kuadër studimeve të tij, në terren ka zhvilluar ekspedita gjuhësore në pjesën veriore të Shqipërisë: Theth, Vermosh, Bogë (2007), Bajram Curri, Dragobi, Cernica, Shoshan, Raja, Viçidol (2012).

Ai ka marrë pjesë në shumë konferenca e simpoziume shkencore dhe ka dhjetëra punime shkencore.

Ka kontribuar në disa projekte, si: IRRSAE Puglia (1992), Progetto EMOL, Fryske Akademy-Olanda (1995), EUROMOSAIC (1993-94). Ka botuar dy libra: Fjalor krahasues i termave të gjuhësisë, shqip-italisht-frëngjisht-anglisht (2011, bashkautor), The Albanian Language in Education in Italy (2010).

Po ashtu, ka qenë anëtar i bordit të INA-s (International Network of Albanology) dhe pjesëmarrës i Seminarit Ndërkombëtar për Gjuhën, Letërsinë dhe Kulturën Shqiptare (herën e parë më 2003). Po ka marrë pjesë në një projekt të përbashkët me Departamentin e Gjuhës Shqipe të Universitetit të Prishtinës, për hulumtimin e të folmeve arbëreshe. Kumtesa e tij e fundit për albanologjinë është mbajtur dhjetorin e shkuar, në Universitetin e Berlinit (Humboldt Universitat).

“Albanologjia nuk ka një tjetër studiues të kalibrit të tij që do ta zëvendësojë në fushën e fonetikës dhe të studimeve në terren”, shkruan në njoftimin e UP-së.