Kryetari i Klinës: Asnjëri nga 40 personat e izoluar nuk ka shenja të coronavirusit

Kryetari i Komunës së Klinës, Zenun Elezaj ka dhënë shpresë se asnjëri nga personat që kanë punuar bashkë me pacienten 20 vjeçare të prekur me coronavirus, nuk ka shenja të kësaj pandemia.

Elezaj, në një lidhje direkte për RTV Dukagjinin ka kërkuar ndihmë nga Ministria e Shëndetësisë për t’u përballur me situatën pas rastit të parë të coronavirusit, përcjell Telegrafi.

Ai ka bërë thirrje që qytetarët të jenë të qetë dhe të bashkëpunojnë me organet shëndetësore dhe ato të sigurisë për ta kaluar këtë situatë.

Në lidhje me 40 personat që kishin punuar bashkë me të prekurën me koronavirus, Elezaj thotë se për momentin asnjëri prej tyre nuk kanë shenja apo simptoma të mundshme të coronavirusit.

Ndërsa Drejtori i Policisë në Klinë, thotë se nuk ka nevojë për panik dhe se 40 personat e vetë izoluar i kanë të gjitha gjërat e nevojshme për momentin.

Lexo po ashtu Zyrtari i Komunës së Klinës jep detaje të reja: E infektuara me coronavirus, ka punuar me 40 persona tjerë

Ndërkohë pas konfirmimit të dy rasteve të para me coronavirus, në mbledhjen e jashtëzakonshme, Qeveria e Kosovës ka vendosur për ndalimin e hyrjeve daljeve të qytetarëve në Klinë dhe Viti, për shkak të dy rasteve të cilët janë konfirmuar me coronavirus e që vijnë pikërisht nga këto dy qytete./Telegrafi/