Thaçi pas takimit me Richard Grenell: E rëndësishme, arritja e marrëveshjes përfundimtare me Serbinë dhe anëtarësimi në Kombet e Bashkuara

E  plotësuar: Presidenti Thaçi përmes një shkrimi në Twitter ka folur për takimin me ambasadorin Grenell.

“Gjithmonë një kënaqësi të takojë Richard Granell. Diskutuam për dialogun Kosovë-Serbi dhe hapat e ardhshëm për arritjen e një marrëveshje përfundimtare për njohjen dhe anëtarësimin në Kombet e Bashkuara. Mirënjohës për dinamikën e re që solli në proces dhe përkushtimin e tij për paqen dhe prosperitetin në rajon”, ka shkruar Thaçi.

Më herët, presidenti i Serbisë, Aleksandar Vuçiq, pas takimit Grenell, ka thënë se “sapo të hiqet taksa”, Serbia është e gatshme t’i kthehet dialogut me Kosovën.

Ai këto komente i bëri, në margjinat e Konferencës së Sigurisë në Mynih të Gjermanisë.

Nis takimi Thaçi-Grenell

Ka filluar takimi ndërmjet presidentit të Kosovës, Hashim Thaçi dhe të Dërguarit të Posaçëm të Presidentit Trump për dialogun midis Kosovës dhe Serbisë, ambasadorin Richard Grenell.

Në këtë takim, presidenti Thaçi dhe ambasadori Grenell do të flasin për progresin e deritanishëm në procesin e dialogut dhe për hapat e ardhshëm drejt arritjes së marrëveshjes finale për njohje të ndërsjellë me Serbinë dhe anëtarësimin në Kombet e Bashkuara.

Thaçi, sot ka udhëtuar drejt Gjermanisë ku nesër do të marr pjesë në Konferencën për Siguri të Munihut.

Ndërkaq, Dialogu i Brukselit, ndërmjet Kosovës dhe Serbisë, ka nisur në vitin 2011, si teknik dhe ka vazhduar që nga viti 2013 si dialog politik, kur edhe është arritur “Marrëveshja e parë për parimet e normalizimit të marrëdhënieve të Beogradit dhe Prishtinës”, njofton Telegrafi.

Që nga nëntori i vitit 2018, kur Kosova ka aplikuar taksën prej 100 për qind ndaj mallrave të Serbisë dhe Bosnjë e Hercegovinës, Beogradi zyrtar e ka suspenduar pjesëmarrjen e tij në dialog deri në heqjen e kësaj mase.

Gjatë ngecjes së këtij dialogu, megjithatë, Berlini dhe Parisi kanë provuar që të kontribuojnë në marrëdhëniet ndërmjet Prishtinës dhe Beogradit., me qëllim të arritjes së një marrëveshje përfundimtare ndërmjet dy palëve. /Telegrafi/

Always a pleasure to meet w/ SE @RichardGrenell. Discussed dialogue b/w Kosovo & Serbia, and next steps twds. reaching a final agreement for recognition & UN membership. Grateful for the new dynamic he brought to the process and his dedication to peace & prosperity in the region pic.twitter.com/hdQ2hiRVPl

— Hashim Thaçi (@HashimThaciRKS) February 13, 2020