Meningjiti në Kosovë, 90 raste të regjistruara

Inflamacion i cipave të trurit, i cili njihet si meningjiti, ka prekur 90 fëmijë gjatë vitit që lamë pas. Një prej tyre, ka humbur jetën. Sipas infektologut, Izet Sadiku, krahasuar me vitin 2018, ka rritje të rasteve prej 17 për qind.

Një fëmijë ka humbur jetën nga meningjiti vitin 2019

Meningjiti një inflamacion i cipave të trurit, që e mbulojnë trurin dhe palcën kurrizore e cila mund të shkaktohet nga viruset ose nga bakteret, ka prekur një numër të madh të fëmijëve.

Sipas infektologut Izet Sadiku nga Klinika Infektive e Qendrës Klinike Universitare të Kosovës, thotë se ka një rritje prej 17% të rasteve krahasuar me vitin 2018.

“Në vitin e kaluar të prekur nga meningjiti kanë qenë të regjistruara 90 raste të moshave fëmijërore ndërsa gjatë vitit 2018 kemi pasur 45 raste që i bie një rritje prej rreth 17%”, Izet Sadiku.

Sadiku shtoi se vitin që lamë pas për një fëmijë ka humbur jetën si pasojë e këtij infeksioni i cili prek kryesisht fëmijët nën 10 vjeç. Ndërsa, aktualisht janë duke u trajtuar dy raste në klinikë.

“Në vitin 2019 një rast i prekur nga meningjiti ka përfunduar me fatalitet. Momentalisht i kemi dy raste në trajtim e që gjendje e tyre është e qëndrueshme”, thotë më tej Izet Sadiku.

Sadiku bënë apel tek prindërit që të mos neglizhojnë temperaturën e lartë tek fëmijët.

“Sugjerimi im është që edhe mjekët familjarë dhe prindërit të kenë shumë kujdes te moshat fëmijërore. Çdo temperaturë, çrregullim i vetëdijes apo mos marrja e ushqimit nga fëmija është simptomë që ai duhet të dërgohet te specialisti pasi trajtimi i hershëm është njëri nga kriteret për shërim të sëmundjes”, tregon më tej infektologu.

Infektologu Izet Sadiku thotë se situata nuk është alarmante, por që duhet pasur kujdes që të mos neglizhohen simptomat.  /Telegrafi/