Deputeti i ri i LVV-së: Vullneti i popullit për ndryshim mbanë emrat Albin Kurti e Vjosa Osmani

Deputeti i zgjedhur i Lëvizjes Vetëvendosje, Gazmend Gjyshinca ka thënë se vullneti i popullit për ndryshim i dalë nga kutitë e votimit më 6 tetor mbanë dy emra kryesorë: Albin Kurti e Vjosa Osmani.

Ai ka thënë se Albin Kurti si kryeministër i votuar nga qytetarët tashmë, e Vjosa Osmani si më e votuara në LDK, përveç emra, përfaqësojnë edhe mendësinë e re, siç ka shkruar ai” që kaq shumë i duhet shtetit tonë tani”.

“Sot, kjo mendësi e re gjendet nën sulm nga ata që përveç se janë plakur në politikë për dekada, edhe na kanë zhytur në këtë dështim. Sot një shoqëri e republikë e tanë po bëhet kurban i konflikteve të brendshme partiake të udhëhequra nga njerëz me mentalitet të “pushtetit të vjetër” e të pangopur për pushtet”, ka shkruar ai në profilin e tij në Facebook, transmeton Telegrafi.

Gjyshinca ka thënë se nëse nuk ka reflektim përballë kësaj situate, kthimi tek populli është rruga më duhur për t’i shërbyer atij më së miri.

Në fund, ai ka thënë se Vetëvendosje është lëvizje e vlerave./Telegrafi/