Shkëmbimi i të burgosurve pritet të zbutë tensionet mes Shteteve të Bashkuara dhe Iranit

Ministri i Jashtëm i Iranit ka thënë se një student amerikan i ndaluar në Iran së shpejti do të ribashkohet me familjen e tij, ndërsa një shkencëtar iranian është liruar nga burgu në Shtetet e Bashkuara si rrjedhojë e këtij veprimi.

Lirimi i iranianit të mbajtur në Shtetet e Bashkuara dhe amerikanit të arrestuar në Iran, si pjesë e një shkëmbimi të burgosurve, shihet si një përparim i mundshëm në zbutjen e tensioneve mes këtyre dy shteteve, transmeton Telegrafi.

Mohammad Javad Zarif, është Ministri i Jashtëm i Iranit, që bëri të ditur sot se studenti i kinez-amerikan Xiyue Wang dhe shkencëtari iranian Massoud Soleimani, do të ribashkohen me familjet e tyre.

“Shumë i kënaqur që profesori Massoud Soleimani dhe Xiyue Wang, do të bashkohen së shpejti me familjet e tyre. Shumë faleminderit për të gjithë të angazhuarit, veçanërisht qeverisë zvicerane”, ka shkruar Zarif në Twitter.

Presidenti amerikan Donald Trump, gjithashtu e pranoi lirimin, duke thënë: “Z. Wang ishte mbajtur nën pretekstin e spiunazhit që prej gushtit 2016”.

“Ne falënderojmë partnerët zviceranë, për ndihmën e tyre në negociatat për lirimin e Z. Wang me Iranin,” shtoi ai.

Deutsche Welle raporton se Zvicra përfaqëson interesat diplomatike Shtetet e Bashkuara në Iran, pasi të dy armiqtë i ndërprenë lidhjet diplomatike, menjëherë pas Revolucionit Islamik të vitit 1979 në Iran. /Telegrafi/