Reagon e tronditur edhe Ava Max: Sa trishtuese të dëgjoj këto lajme shkatërruese për Shqipërinë, qëndroni të fortë

Media të shumta ndërkombëtare kanë raportuar të martën për tërmetet që goditën shtetin shqiptar dhe për këtë nuk kanë munguar as reagimet e personaliteteve të njohura.

Rita Ora, Dua Lipa, Gashi e një sërë emrash tjerë të njohur, kanë shprehur mbështetjen e tyre për familjarët e viktimave dhe të prekurit nga dy tërmetet që goditën Shqipërinë, duke shkaktuar pasoja të shumta.

Një reagim i ndier ka arritur edhe nga artistja e re shqiptare me nam ndërkombëtar, Ava Max.

Këngëtarja me origjinë nga Saranda e Shqipërisë ka bashkëndier dhimbjen me bashkëkombësit e saj, shumë prej të cilëve përfunduan në lot të martën e 26 nëntorit.

Lexo po ashtu Ndodhi në ditëlindjen e saj, Rita Ora: Është e tmerrshme, kam miq dhe familjarë në Shqipëri, të dhurojmë donacione për të prekurit nga tërmetet

Ava Max, emri i vërtetë i së cilës është Amanda Ava Koci, publikoi në InstaStory një pamje të flamurit shqiptar, ku duket i gdhendur në një terren që pasqyron tërmetin.

“Sa trishtuese të dëgjosh këto lajme shkatërruese për Shqipërinë. Lutje për të gjithë të prekurit. Unë ju dua. Qëndroni të fortë”, ka shkruar këngëtarja shqiptare.

Ajo përndryshe ka pak kohë që ka publikuar këngën e saj më të fundit, “Tabu” në bashkëpunim me artistin e famshëm Pablo Alboran, e cila është pritur mirë nga publiku. /Telegrafi/