Ndodhi në ditëlindjen e saj, Rita Ora: Është e tmerrshme, kam miq dhe familjarë në Shqipëri, të dhurojmë donacione për të prekurit nga tërmetet

Shqipëria është prekur ditën e martë nga dy tërmete të tmerrshme.

I pari u regjistrua në orën 04:00 me shkallë të Rihterit 6.4 në Durrës, ndërsa i dyti i fuqishëm ishte me magnitudë 5.4 shkallë të Rihterit dhe u regjistrua në ora 07:10.

Si rrjedhojë, tërmetet shkaktuan mbi 20 viktima dhe afro 600 të lënduar, sipas të dhënave të regjistruara deri më tani.

Të prekur nga kjo gjendje e jashtëzakonshme janë shumë shqiptarë, ndër ta edhe yjet me famë botërore që na përfaqësojnë më së miri në botë.

Sot është ditëlindja e saj e 29-të, me çka do duhej të ishte ndër ditët më të lumtura për të, por këngëtarja shqiptare me famë ndërkombëtare, Rita Ora, mëngjesin e së martës u zgjua me një lajm të tmerrshëm.

Viktimat dhe dëmet e mëdha të shkaktuara nga tërmetet në Shqipëri, kanë bërë që artistja të kthejë kokën nga populli i saj, duke treguar përmes rrjeteve sociale dhimbjen që po bashkëndjen me të gjithë shqiptarët në këtë ditë vështirë.

Në orët e mbrëmjes të së martës, Rita vendosi të bëjë një thirrje përmes rrjetit social Twitter dhe Instagram, duke bërë thirrje që t’i bashkohen donacionit online për të dhuruar fonde, për të ndihmuar të prekurit nga tërmetet në Shqipëri.

This is horrible news and a devastating day for those in Albania. 16 have died so far and over 600 injured. I have family and friends in Albania so for my birthday I’m calling everyone to donate to a crisis appeal!! my prayers are with you #Albania https://t.co/prHJ1xl70A pic.twitter.com/pb8duPgp5d

— Rita Ora 🧡 (@RitaOra) November 26, 2019

“Ky është një lajm i tmerrshëm dhe një ditë shkatërruese për ata në Shqipëri. 16 kanë vdekur deri më tani dhe mbi 600 të plagosur. Unë kam familje dhe miq në Shqipëri, kështu që për ditëlindjen time po i thërras të gjithë të dhurojnë për një apel krize !! lutjet e mia janë me ju”, kanë qenë fjalët e këngëtares shqiptare me famë botërore.

Rita si një 29 vjeçare numëron suksese të shumta në arenën ndërkombëtare të muzikës. Ajo është krenuar gjithmonë me origjinën e saj, tekka ka kënduar falas në Shqipëri për 100 vjetorin e Pavarësisë më 28 nëntor 2012, dhe po ashtu në 10 vjetorin e Pavarësisë së Kosovës më 18 shkurt 2018.

Si ambasadore e organizatës më të madhe bamirëse në botë, UNICEF, Rita së bashku me disa nga përfaqësuesit e kësaj organizate vizituan këtë vit Kosovën me një mision të veçantë, për t’u dalë në ndihmë disa familjeve skamnore në vendlindjen e saj. /Telegrafi/