Në rrugën “Malësorët”,  banorët e Mitrovicës mund të transportojnë të moshuarit vetëm me karrocë

Jo larg tunelit të parë në Komunën e Mitrovicës, gjendet rruga “Malësorët”, e cila sipas banorëve është në gjendje të keqe që nga pas lufta. E vështirësitë për qarkullim, banorët thonë se bëhen më të mëdha në stinën e dimrit. Nga Komuna e Mitrovicës, bëjnë të ditur se janë në pritje të operatorit të kontraktuar.

Rrugën “Malësorët” Ismajl Bejta nga Mitrovica e frekuenton çdo ditë.

Mirëpo shqetësuese për Bejtën është gjendja e keqe e saj, sidomos tani që jemi afër stinës së dimrit. Sipas tij, kjo rrugë bëhet e pakalueshme.

“Jetoj prej 45 vitesh në këtë lagje. Kjo rrugë gjithmonë ka qenë problematike. Këtu është problem edhe verës të kalohet me veturë e lëre më dimrit”, shprehet për RTV Dukagjinin, Ismajl Bejta.

Njëjtë janë shprehur edhe banorë të tjerë.

“Rruga është shumë e vështirë. 12 familje jetojmë në këtë vend. Deri më tani askush nuk ka ndërmarrë asgjë për të zgjidhur këtë problem. Veturat nuk mund të dalin, pos ndonjë xhip”, thotë banori tjetër Imer Ahmeti.

“Gjatë stinës së dimrit të moshuarit vetëm me karroca mund të transportohen. Edhe artikujt për nevoja shtëpiake i bartim me karroca. Veturat nuk mund të kalojnë”, shprehet banori Hajzer Fazliu.

Për gjendjen e kësaj rruge është në dijeni edhe Komuna e Mitrovicës. Nga Drejtoria për Shërbime Publike dhe Infrastrukturë thonë se janë në pritje që operatori ekonomik i kontraktuar të fillojë punimet për rregullimin e kësaj rruge.

“Kjo Drejtori ka marrë vendim që të bëhet rregullimi i rrugës “Malsorët”, tek Tuneli i Parë. Aktualisht jemi në pritje që operatori ekonomik i kontraktuar të fillojë më punimet në rregullimin e kësaj rruge”, thuhet në përgjigjen e Drejtorisë për Shërbime Publike.

Banorët janë ankuar se gjendja e keqe e rrugës “Malësorët” është që nga paslufta, sipas tyre, nuk është investuar. /RTV Dukagjini/Telegrafi/