Aliu-Vuçiqit: Nuk mund të ankohesh për simbolet tona kombëtare, me të cilat kurrë nuk kemi pushtuar asnjë fqinj

Kandidati për deputet nga radhët e Lëvizjes Vetëvendosje, Liburn Aliu, ka komentuar deklaratat e  Presidentit të Serbisë, Aleksandar Vuçiq, i cili kishte reaguar për një fotografi në të cilën shihen ambasadori britanik në Kosovë, Nicholas Abbott, bashkë me liderin e Lëvizjes Vetëvendosje, Albin Kurti, dhe se ajo çfarë e kishte penguar presidentin serb kishte qenë flamuri shqiptar në prapavijë.

Aliu në një postim në llogarinë e tij në Facebook ka shkruar se Presidenti i Serbisë duhet të dijë se Kosova është demokraci, ku askush nuk i imponohet dot dikujt për identitetin apo simbolet, e aq më pak sipas tij mund të censurohet vullneti politik i një subjekti.

Aliu ka thënë Vuçiqi i cili para pak muajve në Mitrovicë mbajti fjalim lavdërues për Milosheviqin, nuk është as në pozitën morale e as politike të ankohet për simbolet tona kombëtare, me të cilat Aliu ka thënë se kurrë nuk kemi pushtuar e nuk kemi dëmtuar asnjë fqinjë.

Postimi i plotë i Aliut:

Presidenti i Republikës së Serbisë ka shprehur shqetësim pse një subjekt politik në Republikën e Kosovës, Lëvizja VETËVENDOSJE!, ku unë bëj pjesë, në zyrat e saj mban flamurin shqiptar.

Presidenti i Serbisë le të dijë se Kosova është demokraci, ku askush nuk i imponohet dot dikujt për identitetin apo simbolet, e aq më pak mund të censurohet vullneti politik i një subjekti. Lëvizja i ka fituar zgjedhjet e do të qeverisë, në bashkëpunim me minoritetet e duke i çliruar ato prej shantazheve e instrumentalizimeve. Synim i yni është thellimi i demokracisë, lufta ndaj pabarazive, zhvillimi ekonomik dhe paqja. Këtë të fundit e kërcënon procesi intensiv i armatimit të Serbisë, mosnjohja e pavarësisë së Kosovës dhe mospërballja e Serbisë me të shkuarën e saj kriminale e spastruese.

Aleksandar Vuçiqi i cili para pak muajve në Mitrovicë mbajti fjalim lavdërues për Milosheviqin, nuk është as në pozitën morale e as politike të ankohet për simbolet tona kombëtare, me të cilat kurrë nuk kemi pushtuar e nuk kemi dëmtuar asnjë fqinjë.

Po ashtu edhe Ambasada e Britanisë së Madhe në Kosovë ka dalë me një deklaratë pas reagimit rreth kësa fotografie nga presidentit serb, Aleksandar Vuçiq.

Dhe lidhur me këtë, Ambasada e Britanisë së Madhe është përgjigjur: “Një foto e Ambasadorit në takim me një nga udhëheqësit politik në Kosovë ka marrë vëmendje në rajon. Është punë e ambasadës që të punojë me akterë udhëheqës politik në Kosovë. Ne nuk kemi zgjedhur se si bashkëbiseduesi ynë, në kapacitetin e tij partiak, ka rregulluar dhomën”. /Telegrafi/