Ministri Ismaili përuron 101 barnatore të reja në QKUK: Çdo ilaç do të shkoj te pacienti

Ministri i Shëndetësisë, Uran Ismaili, i shoqëruar nga drejtori i SHSKUK-së, Basri Sejdiu, ka përuruar sot projektin e “Transformimit Farmacuetik”, që përfshinë hapjen e 101 barnatoreve të Klinikave dhe reparteve.

Të gjitha barnatoret brenda QKUK-së do të jenë të pajisura me infrastrukturë të re, kamera, kontrollë të hyrjes, inventar medicinal dhe administrative, të cilat garantojnë që secili bari i blerë të shkoj deri te pacienti, thuhet në njoftimin për media.

Për më tepër, i gjithë zinxhiri shpërndarës i barnave do të jetë i kontrolluar në mënyrë digjitale.

Gjatë përurimit të këtij projekti, ministri Ismaili tha se ky projekt, përveç që siguron një ruajte optimale të barnave, garanton edhe që ato të shkojnë deri te pacienti.

“101 barnatore të Klinkave dhe reparteve në QKUK, që pacientët të kenë barnat të cilat kanë nevojë afër dhe të sigurta. Për 20 vjet nuk ka pasur asnjëherë asnjë sistem të mirëfilltë se si janë menaxhuar barnat në QKUK. Çdo barnatore do të jetë e monitoruar me sistem elektronik, kamera, barkode dhe dyer me qasje të kufizuar. Asnjë ilaç që u dedikohet pacientëve nuk do të humbas dhe nuk do të prishet duke u mbajtur në kushte jonormale”, ka thënë ministri Ismaili.

Drejtori i SHSKUK-së, Basri Sejdiu, tha se ky projekt do të luaj një rol të rëndësishëm që barnat të cilat blihen për pacientë të arrijnë deri te ta. /Telegrafi/