Wilder tregon pikat e dobëta të Joshuas: Ruiz e fiton rimeçin

Deontay Wilder dyshon nëse Anthony Joshua do të arrijë t’i rikthejë titujt e tij në rimeçin ndaj Andy Ruiz Jr që do të zhvillohet gjatë këtij viti, për shkak “të shenjave të këqija” që i ka dhënë në duelin e parë.

Boksieri meksikano-amerikan e shokoi botën e boksit në muajin e kaluar kur e rrëzoi plot katër herë ish-kampionin e unifikuar në duelin e zhvilluar në Madison Square Garden të New Yorkut dhe ia rrëmbeu titujt me nokaut teknik në raundin e shtatë.

Britaniku e ka aktivizuar menjëherë klauzolën për rimeçin, i cili do të ndodhë gjatë këtij viti (me shumë mundësi në muajin dhjetor në Cardiff ose në fund të nëntorit në New York).

Mirëpo, kampioni i pamposhtur i WBC-së, Deontay Wilder, beson se AJ tregoi shumë dobësi në përballjen e parë dhe vështirë se mund t’i rikthejë titujt.

“Mendoj se Ruiz do ta fitojë rimeçin. Mendoj se Joshua as që e din si ka humbur. Ai as që e di se me çfarë është goditur. Kjo është një shenjë e keqe. U rrëzua katër herë”.

“Do ta ketë shumë të vështirë tash, sepse ai nuk e di se pse ka humbur. Ai nuk e di se cilat gjuajtje e kanë goditur. U kthye në këndin e tij dhe tha: ‘Me çfarë jam goditur’? Kjo është pyetja e gabuar për t’u bërë”.

“Ai e nxori mbrojtësen e gojës, kjo është një shenjë se ke nevojë për të marrë frymë, ai nuk mund të merrte frymë. Gjyqtari u desh t’i thoshte që të kthehej dhe të luftonte…”.

“Një tjetër shenjë ishte shikimi drejt këndit të tij. Ai nuk dëshironte të ishte më aty. Vet e lejoi gjyqtarin që ta ndalte meçin. Kur je në këtë sport, mund t’i lexosh shenjat dhe pavarësisht çfarë thonë të tjerët, ai u dorëzua, ai u tërhoq”, ka thënë Wilder. /Telegrafi/