Ristevska e PSP-së: Çdo herë kemi punuar sipas ligjeve, qëndrojmë pas punës që e kemi bërë

Prokurorja e Prokurorisë Speciale Publike (PSP) Lençe Ristevska, sot në konferencë për shtyp është sqaruar në lidhje me ngjarjet e fundit në të cilat është përfshirë edhe kjo prokurori.

Ristevska tha se PSP si ekip çdo herë kanë punuar sipas rregullave ligjore dhe qëndrojnë pas punës që e kanë bërë, njofton Telegrafi Maqedoni.

Ajo shtoi se nëse përfshihen individë të PSP-së në dyshime të caktuara, atëherë pjesë e saj është edhe Prokuroria Speciale si institucion.

“Si ekip çdo herë kemi vepruar sipas ligjeve dhe jemi munduar të jemi në nivel të detyrës. Në këtë drejtim dua të theksoj se qëndrojmë pas punës që kemi bërë deri tani dhe prapa lëndëve që kemi hapur. Dua të informoj se me vëmendje ndjekim ngjarjet e fundit, për të cilat shqetësohemi shumë dhe apelojmë që të respektohet prezumimi i pafajësisë”.

“I bashkohemi thirrjes së kryeprokurorit që të hetohen të gjitha dyshimet për krime dhe korrupsione. Edhe një herë dua të theksoj, se të gjitha dyshimet për përfshirje të individëve, përfshijnë edhe këtë institucion”, tha mes tjerash Ristevska.

Ajo shtoi se kryeprokurorja speciale Katica Janeva, nuk është pjesë e hetimeve të Prokurorisë Themelore, ndërsa nuk komentoi për dyshimet që përmenden në opinion.

E pyetur për mungesën e saj kohëve të fundit në opinion, ajo tha se ka qenë vendim i menaxhmentit të marrëdhënieve me publikun të PSP-së, duke shtuar se është e rëndësishme që sot është këtu./Telegrafi/