Presidenca konfirmon takimin Meta-Basha, presin që edhe kryeministri Rama të gjejë kohë

Nesër në Presidencën e Shqipërisë do të zhvillohet një takim midis Ilir Metës dhe kryeopozitarit Lulzim Basha, ky infomacion është konfirmuar së fundmi nga zëdhënësi i presidentit, Tedi Blushi.

“Presidenti i Republikës Sh.T.Z Ilir Meta i ka ftuar zyrtarisht në takim kryetarin e Partisë Socialiste dhe kryetarin e Partisë Demokratike për të biseduar për situatën politike në vend. Takimi me z.Basha është fiksuar të zhvillohet nesër në ora 09:00”, thuhet në reagimin e Blushit.

Sa i përket refuzimit të kryeministrit Edi Rama për t’u takuar nesër me Metën, pasi ftesa i është dërguar edhe atij, në reagimin e Presidencës thuhet se janë në pritje që kryeministri të gjejë kohë.

“Duke qenë në dijeni që z.Rama është i zënë me takime, Presidenti do të jetë nesër në zyrë nga ora 05:00 deri në ora 13:00 duke pritur sërish që kryeministri të gjejë kohë”, thuhet në reagimin e Tedi Blushit.

Lexo po ashtu Presidenti Meta fton kryeministrin Rama në takim, ky i fundit i thotë se është i zënë

Kjo është ftesa e parë zyrtare që Ilir Meta u drejton kryetarëve të PS dhe PD për të gjetur një zgjidhje mbi krizën, e cila mori një tjetër dimension pas dekretit për shfuqizimin e 30 qershorit si datë për zgjedhjet lokale.