Haradinaj: Samiti i Berlinit e ka normalizuar rajonin

Kryeministri i Kosovës, Ramush Haradinaj, pas mbledhjes së Qeverisë ka thënë se Samiti i Berlinit e ka normalizuar rajonin, dhe që pjesa kryesore e këtij samiti i është kushtuar marrëdhënieve Kosovë-Serbi, transmeton Telegrafi.

Para mediave, kryeministri Haradinaj ka folur edhe për takimin e ardhshëm i cili do të mbahet pas tre muajsh në Paris.

“Kosova duhet të plotësojë formatin e tij, sepse nuk bëhet vetëm fjalë për një takim, por për një dialog, dhe se në dialog duhet të jetë edhe delegacioni i mandatuar nga parlamenti. Përveç presidentit Thaçi, duhet të jenë edhe Limaj, Pacolli e Ahmeti. Po shkojmë në një proces serioz”.

“Sa i përket marrëdhënies Kosovë-Serbi, besoj se tashmë jemi formuar, dhe nuk shkohet në dialog për shkëmbim territoresh por për njohjen reciproke. Dhe është qartësuar se nuk do të diskutohet për taksën”.

“Takimi i Parisit është më serioz, dhe duhet të koordinohemi me Amerikën sepse është garantuese e një marrëveshje”.

Haradinaj theksoi se kanë konfirmuar pjesëmarrjen në takimin e Parisit.

Gjithashtu, kryeministri deklaroi se idetë për shkëmbimin e territoreve tashmë i përkasin të kaluarës. /Telegrafi/