KFOR-i italian dhuroi pajisje mjekësore për QKMF-ën në Malishevë

Sot në Qendrën Kryesore të Mjekësisë Familjare në Malishevë, ka qëndruar komandanti i grupit shumëkombësh luftarak-perëndim të KFOR-it, kolonel Gianfranco Di Marco, i shoqëruar edhe nga shoqata nacionale alpine, seksioni Trento, të cilët i kanë dhuruar një donacion në pajisje mjekësore për QKMF-në.

KFOR-i italian dhe përfaqësuesit e kësaj shoqate italiane, janë pritur nga drejtori i Drejtorisë për Shëndetësi dhe Mirëqenie Sociale, Liridon Hoti dhe drejtori i QKMF-së në Malishevë, Nuhi Morina, të cilët i kanë falënderuar KFOR-in dhe shoqatën italiane, për këtë donacion domethënës.

Donacioni i sjellë përmes KFOR-it italian, nga shoqata nacionale alpine, seksioni Trento nga Italia, është dy defribilator dhe një elektrokardiogram (EKG), të cilët kanë qenë shumë të nevojshëm për QKMF-në në Malishevë.

Në emër të Komunës së Malishevës, drejtori i Drejtorisë për Shëndetësi, Liridon Hoti i ka falënderuar KFOR-in dhe shoqatën italiane, për këtë donacion që sipas drejtorit Hoti, kanë rëndësi të madhe për vet QKMF-në dhe popullatën e Malishevës. Drejtori Hoti, gjithashtu e ka falënderuar KFOR-in dhe popullin italian për mbështetjen e vazhdueshme për vendon tonë, e sidomos nga koha e luftës, e deri më tani, pasi në vazhdimësi ka qenë afër popullit të Kosovës.

Edhe drejtori i QKMF-së, Nuhi Morina, i ka falënderuar KFOR-in italian dhe shoqatën italiane, e cila e ka sjellë këtë donacion për qendrën mjekësisë në Malishevë. “Faleminderit për donacionin e dhënë për QKMF-në dhe popullatën e Malishevës, sepse këto mjete përveç se do jenë në shërbim të pacientëve në nevojë, na ndihmon edhe neve në rritjen e cilësisë së ofrimit të shërbimeve shëndetësore”, tha drejtori i QKMF, Nuhi Morina.

Komandanti i KFOR-it italian, kolonel Gianfranco Di Marco, duke marrë fjalën në këtë rast, ka thënë se “roli i KFOR-it ka qenë ndërmjetësues me shoqatën italiane, por shpresoj se këto mjete do të shërbejnë në punën tuaj që bëni çdo ditë këtu, në shërbim të popullatës”.

Edhe përfaqësuesit e Shoqatës Nacionale Alpine, seksioni Trento, kanë thënë se “shoqata e tyre i është përgjigjur pozitivisht kërkesës së KFOR-it për sjelljen e këtyre mjeteve dhe shprehën kënaqësinë e tyre për mundësinë që kanë pasur si shoqatë, për të ofruar këtë mbështetje për popullatën vendore”./kp/