Sonte të gjithë para televizorit, fillon emisioni i ri “Portal Show” në TV Dukagjini

Pasi janë bërë të gjitha përgatitjet dhe provat e nevojshme, sonte prej orës 22:40 do të startojë emisioni PORTAL SHOW, i cili do të jetë i përjavshëm, për çdo të enjte në këtë termin, i drejtuar, siç dihet tash më, nga aktori Jeton Zogjani, i njohur për publikun me rolin e drenicakut në serialin O SA MIRË.

Ky është emisioni më i madh i këtij lloji, i cili do të përfshijë një numër më të madh të pjesëmarrësve se zakonisht dhe do të trajtojë disa tema, duke qenë kështu informativ dhe argëtues.

Nga temat serioze aktuale deri te satira, humori e muzika, do të kenë vend për të gjithë, për çka do të arrijë të përmbush pritjet të disa grupeve, si nga mosha ashtu edhe për nga profili. Një vend ku do të takohen të gjithë dhe do të flasin për gjithçka.

Në emisionin e parë do të ketë të ftuar, mysafirë nga Shqipëria, nga Maqedonia, politikanë, muzikantë, aktorë e telente të ndryshme. Brenda studios ka edhe një miniskenë, të nevojshme për interpretues të ndryshëm që kanë për të demonstruar talentin e tyre para publikut.

Kjo është natyra e emisionit, e konceptuar për nevojat e publikut kosovar, nga skenaristi Arbëresh Dalipi, i cili do të jetë mbrapa aktorit Jeton Zogjani me organizimin e emisionit, përzgjedhjen e temave dhe mysafirëve. /Telegrafi/