Bajram Kabashi, qe 60 vite ushtron zejen e këpucëtarit (Video)

Edhe pse i është bërë rutinë, Bajram Kabashi me plot vullnet e hap çdo mëngjes punëtorinë e tij në Rahovec. E hap atë dhe vazhdon ditën, duke riparuar lloj-lloj këpucësh.

Bajram Kabashi, nga qyteti i Rahovecit tash e 60 vite njihet si këpucëtar, i cili nuk është lodhur asnjëherë nga ky zanat.

Ai ka thënë se zanatin e ka mësuar nga babai i tij.

“Me këtë zanat baba ka punuar prej 55 vitesh. Unë kam trashëguar traditën e babës. Më herët nga ky zanat kemi jetuar familja 10 anëtarëshe, por sot është më problem të ja dalësh”, tregon këpucëtari Kabashi.

Si i vogël, ai vazhdimisht ka shkuar në lokalin ku punonte i ati, ku ka mësuar rreth zanatit të këpucëtarisë.

Por, duke mos e ditur asnjëherë, që një ditë do të njihej si njëri nga këpucëtarët më të vjetër të vendit.

Bajram Kabashi së bashku me vëllain e tij, e kanë vazhduar traditën të cilën e ka nisur babai i tyre.

Ai ka thënë se në qytetin e Rahovecit janë këpucëtarët e vetëm që kanë vazhduar këtë zanat.

“Bëjmë riparime të këpucëve, të jakneve të lëkurës, ndonjë qante. I kemi të gjitha mjetet e nevojshme për këtë zanat”, tregon Bajram Kabashi.

E veçanta e tij është puna e cila është e tëra punuar me dorë.

“E dua këtë punë sepse më ka hyrë në gjak sepse nga vegjëlia jam marrë me këtë zanat. Dal këtu sa për të humbur kohë, pasi në këtë moshë duhet mu marrë me diçka për të humbur kohën”, tregon më tej Bajram Kabashi.

Edhe pse tash është pothuajse 70 vjet, plaku me mjekër e me duart punëtore nuk mjaftohet asnjëherë nga ky zanat.

Bajram Kabashi ka thënë se gjatë qëndrimit në këtë lokal, nuk lodhet asnjëherë./RTV Dukagjini/Telegrafi/