Basha pas takimit me zyrtarët e PE: Rama në emër të stabilitetit, shkatërroi drejtësinë

Në përfundim të takimit me delegacionin e Parlamentit Evropian, kryedemokrati Lulzim Basha tha se opozita nuk mund të jetë fasadë e qeverisë.

Ai deklaroi se në fazën kur vendi synon të bëhet anëtar i Bashkimit Evropian, qëllimi i opozitës është t’i shpjegojë partnerëve gjendjen e vendit.

Sipas Bashës, krimi elektoral ka krijuar destabilitet, ndërsa shtoi se demokracia është shkatërruar.

“Shqetësimi i ndërkombëtarëve është stabiliteti, por Rama në emër të stabilitetit shkatërroi drejtësinë. Ai ka ndërtuar një makineri propagande për të mashtruar qytetarët. Rama ka qasje anti-europiane dhe anti-NATO.Dua të falënderoj Euro-deputetët për mundësinë që i dhanë opozitës së bashkuar për të prezantuar gjendjen kritike ku ndodhet demokracia shqiptare, ku në Shqipëri nuk ka një qeveri që punon për popullin, por për krimin. Një nga problemet e mëdha është dezinformimi që Edi Rama me paratë e drogës bën”, tha Basha.

Ai deklaroi se zgjidhja e këtij problemi, vjen vetëm me zgjedhje të lira.

“Shqipëria ndodhet në një situatë të rëndë dhe mund të zgjidhet vetëm me një qeveri transitore dhe zgjedhje të lira. Zgjidhja e kësaj situate nuk vjen me arrestimin fasadë të Vangjush Dakos, sa për sy e faqe. Kjo zgjidhjen vjen vetëm me një qeverisje transitore dhe zgjedhje të lira. Detyra jonë është të shpjegojmë realitetin që shqiptarët e vuajnë përditë. Në këtë fazë ku ndodhet vendi, ku synon të hapen negociatat me BE-në, duhet të sqarojmë se Edi Rama me veprimet e tij ka shkatërruar stabilitetin e vendit”, deklaroi Lulzim Basha.