Fotografia që bëri histori, rrëfen gruaja simbol i refugjatëve të Kosovës (Video)

Fotografia e cila u shkrep na Bllacë të Maqedonisë,  u bë simbol i refugjatëve të Kosovës, gjatë vitit 1999.

Në kolonën e mijëra njerëzve, që u detyruan të largoheshin me dhunë nga vendlindjet e tyre,   ndër ta ishte edhe Sherife Luta, nga fshati Ivajë i Kaçanikut, fotoja e së cilës kishte goditur botën. Sot, Sherifja jeton më bashkëshortin dhe fëmijët e saj në Kaçanik të vjetër.

Sherifja atë ditë, kur edhe është bërë ajo fotografi, e kujton edhe sot me të njëjtin emocion.

“Viti 1999. Me 8 mars kemi dalë nga shtëpia pasi kishin filluar granatimet. Unë isha 22 vjeçare kur ja bashkëngjita karvanit. Ka qenë një ditë shumë i vështirë. Besa ka qenë shumë e vogël dhe ka qarë gjithë kohës. Nuk kemi pasur çfarë të hamë e pimë, vajza ka qëndruar tërë kohën në gji. Kam pasur edhe ndihmën e kunatës dhe babës”, rrëfen Sherife Luta për RTV Dukagjinin.

Me kokën e mbështjellë me një shami të bardhë dhe me gjirin jashtë, duke ushqyer foshnjën e saj gjashtë muajshe, Sherifja ishte bërë “Nëna nga fotoja e ballinave botërore”.

“Ka pasur shumë kameramana, por ata shënjetsronin rastet më të vështira. Fotografimi më është bërë në Bllacë, kanë dashur edhe një prononcim me zë, por unë nuk kam mundur sepse isha shumë e lodhur”, tregon më tej Sherife Luta.

Sherife Luta kishte marrë rrugën e vetme, pa bashkëshortin e saj Mirvat Luten, sepse ai ishte bashkuar  UÇK-së, pa e ditur se ç’po ndodhte me familjen e tij, apo edhe më keq, pa e ditur nëse ata do të  ishin gjallë.

“Unë nuk e kam ditur ku kanë shkuar. Në fillim kishin shkuar në Shkup, pastaj në Tetovë. Pas pas ditësh ka ardhur një bashkëluftëtar i imi dhe më ka thënë se i kam familjarët në Tetovë. Jam takuar me ta pas rreth gjashtë muajsh”, shprehet Mirvat Luta, përcjell Telegrafi.

Vajza e cila ishte shfaqur në mediat botërore, në gjirin e nënës së saj, ishte vetëm gjashtë muajshe. Besiana sot është 20 vjeçe, dhe ka thënë se për atë fotografi , sot ka shumë emocione, sepse për të i kishin rrëfyer shumë prindërit e saj.

“Prindërit e mi më kanë treguar kur kam qenë në klasën e tretë. Sa herë e shoh këtë foto emocionohem. Nëna ime ka bërë shumë sakrificë për mua. Është një histori që i ka lënë Kosovës”, shprehet Besiana Luta.

Ato ditë të vështira mbijetese, edhe pse kanë kaluar 20 vite pas, këta familjarë i kanë edhe sot shumë të freskëta në kujtime./RTV Dukagjini/Telegrafi/