AAK-ja prish koalicionin me AKR-në në Mitrovicë

Aleanca për Ardhmërinë e Kosovës dhe Aleanca Kosova e Re nuk do të bashkëpunojnë më në komunën e Mitrovicës.

Partia e kryeministrit Haradinaj, ka vendosur që ta prish koalicionin me AKR-në në qytetin e Mitrovicës.

Këtë e ka bërë të ditur AAK-ja nëpërmjet një postimi në rrjetin social Facebook, transmeton Telegrafi.

Aleanca për Ardhmërinë e Kosovës, ka vlerësuar se AKR-ja ka mungesë të vullnetit për bashkëpunim.

“Aleanca për Ardhmërinë e Kosovës (AAK), sot ka vendosur që të ndërpritet koalicioni me Aleancën Kosova e Re (AKR) në komunën e Mitrovicës. Pas tentimeve të shumta për të harmonizuar qëndrimet dhe programin e AAK-së në këtë Komunë, është vlerësuar se AKR ka mungesë të theksuar të vullnetit për bashkëpunim”, thuhet në postimin e AAK-së.

“Zhvillimet e javëve të fundit në Mitrovicë kanë qenë vendimtare në marrjen e këtij vendimi. AAK mbetet e përkushtuar për qeverisje të mirë si në nivel qendror po ashtu edhe në atë lokal”, përfundon postimi i kësaj partie.

Ndryshe, disa ditë më parë ishte shkarkuar kryesuesi i Asamblesë komunale në Mitrovicë, Jeton Ujkani. /Telegrafi/