As vizita e Putinit nuk bëri punë, në Beograd vazhdojnë protestat kundër Vuçiqit (Video)

Mijëra veta parakaluan rrugëve të Beogradit në protestat kundër, siç thuhet, sundimit autokratik të presidentit të Serbisë, Aleksandër Vuçiq.

Protesta e së shtunës pasoi tubimin e partisë së presidentit Vuçiq të enjten gjatë vizitës së presidentit rus Vladimir Putin në Beograd.

Kritikët e presidentit Vuçiq thonë se ai e organizoi tubimin në një përpjekje për të dyshuar se ka më shumë mbështetës sesa kundërshtarët e tij në Serbi.

Duke brohoritur, “Vuçiq largohu” turma parakaloi para selisë së televizionit publik, i cili ka injoruar në masë të madhe protestat disa javëshe, raporton VoA.

Kritikët e akuzojnë presidentin Vuçiq për vendosje të autokracisë nëpërmjet kontrollimit të rreptë të medies dhe nxitjes së gjuhës së urrejtjes ndaj kundërshtarëve. Ai i ka hedhur poshtë këto akuza.

Protestuesit kërkuan liri të medies si parakusht për zgjedhje të lira e të drejta.

Protestat me sloganin “Një nga pesë milionë”, filluan shtatë javë më parë me moton “stop këmishëve të përgjakura”, kur ndodhi një sulm mbi Borislav Stefanoviqin, udhëheqës i partisë së vogël ‘E Majta serbe’.

Ai ishte sulmuar nga një grup burrash me maska të zeza më 23 nëntor në Krushevc, një qytet në jug të Serbisë dhe kishte pësuar plagë të lehta.

Në muajin dhjetor, presidenti serb tha se nuk do të përmbushë kërkesat e opozitës edhe nëse “dalin 5 milionë në rrugë”, por më pas ai tha se është i gatshëm të çojë vendin në zgjedhje të parakohshme. Partitë opozitare thanë se do të bojkotonin zgjedhjet e tilla.

Mbështetja për presidentin Vuçiq ka shënuar një rënie të vogël pas fitores së tij të thellë në zgjedhjet presidenciale të vitit 2016, por ai mbetet udhëheqësi politik më popullor dhe koalicioni i tij në pushtet ka një shumicë të qëndrueshme prej 160 deputetësh në parlamentin me 250 vende.

Protestat janë zgjeruar edhe në disa qytete të tjera të Serbisë.