Hardinaj flet për punësimet në administratë dhe qeveri

Kryeministri Ramush Haradinaj ka thënë se në vitin 2019 do të jetë prioritet ekonomia. Ai u shpreh se se nuk është përmbyllur ende reforma për lirimin e bizneseve nga ngarkesat tatimore.

Këto komente Haradinaj i ka bërë gjatë një takimi me drejtues të Odës Ekonomike Amerikane.

Pas komenteve të komunitetit të bizneseve se sektori publik dhe Qeveria është bërë vend tërheqës për punësime, ndërsa sektori privat ka mbetur jo tërheqës, ai ka komentuar edhe punësimet në administratë e qeveri.

“Te pagat s’ka pasur ligj për paga, pra është hera e parë që do të ndodhë shumë shpejt Ligji për Pagat, me gjithë defektet që mund t’i ketë. Punësimi në kabinetin qeveritar ka ndodhë në vazhdimësi, në Qeverinë Thaçi, në Qeverinë Mustafa, ndërsa me ardhjen time nuk janë më shumë se 40”, tha ai.

Haradinaj nuk harroi as me këtë rast ndikimin ekonomik të taksës ndaj Serbisë.

Lexo po ashtu Taksa ndaj produkteve të Serbisë nuk duhet të largohet pavarësisht presioneve të BE-së

“Investimet e huaja, kemi investitorë të huaj, siç është Bechtel & Enka, por pritet edhe një investitorë për energji elektrike siç është Contur Global. Pra, ky vit do të jetë i ekonomisë. Taksa ndaj Serbisë ndoshta ka qit probleme për disa importues, por ky vendim është politik. E kemi ditë që i ka disa ndikime të rënda për disa biznese në Kosovë”, tha ai duke kërkuar nga prodhuesit që të kenë kujdes për çmimet e produkteve, të mos i shtrenjtojnë.

Haradinaj lidhur me buxhetin 2019 ka thënë se Kuvendi është në pushim, dhe në fund të muajt do të mbahet një seancë për buxhetin.

“PSD i ka disa kërkesa për buxhetin që besoj se do t’i realizojmë”, tha ai.

Për sa i përket çështjes së Telekomit, Haradinaj tha se në këtë vit shpreson që do të bëhet një zgjidhje për kompani, që sipas tij, është bukur i komplikuar.

Drejtori Ekzekutiv në Odën Ekonomike Amerikane, Arian Zeka, ka thënë se qëllimi i takimit është diskutimi lidhur me përshpejtimin e zhvillimit ekonomik.

Zeka shpreson që viti 2019 do të jetë me prioritet ashtu siç është paralajmëruar nga kryeministri, një vit i zhvillimit ekonomik.

Ndërsa, Ilir Ibrahimi, kryetar i Bordit të OAK ka inkurajuar qeverinë për reformat qeveritare, por sipas tij, këto duhet të ndodhin në vazhdimësi për përmirësimin e klimës së të bërit biznes. /KP /Telegrafi/