Kosova vendos taksën 100% për produktet serbe, Vuçiq thërret Këshillin e Sigurisë Kombëtare

Me rastin e masave më të fundit të Prishtinës, të cilat sipas mediave serbe, praktikisht bllokojnë tërësisht mallrat serbe në Kosovë, presidenti serb Aleksandar Vuçiq është takuar sonte pas orës 17.30 me ambasadorët e vendeve të Kuintit dhe kreun e delegacionit të BE-së.

Vuçiq, siç shkruajnë mediat serbe, përcjell Telegrafi, paraprakisht ka zhvilluar takime edhe me ambasadorët e Rusisë dhe Kinës.

Po sipas tyre, presidenti serb gjithashtu ka thirrur një takim të Këshillit të Sigurisë Kombëtare, për orët e vona të ditës së sotme.

Qeveria e Kosovës vendosi sot të rrisë taksat mbi produktet nga Serbia me 100 për qind.

Lexo po ashtu Qeveria e Kosovës vendos taksë 100% për prodhimet e Serbisë

Dhe sipas mediave serbe, ky veprim nga Prishtina mund të konsiderohet si një nga situatat më sfiduese dhe më të vështira politike që nga shpallja e pavarësisë së Kosovës.

Ndryshe, Qeveria e Kosovës ka marr të mërkurën vendim që të vendosen masa mbrojtëse prej 100 për qind për produktet e importuara nga Serbia dhe Bosnja e Hercegovina.

Propozimin e Ministrit të Tregtisë dhe Industrisë, Endrit Shala, për të vendosur taksë prej 100 për qind ndaj produkteve serbe dhe atyre nga Bosnja e Hercegovina, e ka miratuar kabineti qeveritar.

Ai po ashtu ka kërkuar edhe largimin e të gjitha produkteve në të cilat shkruan ‘Kosova e Metohija’.

Kryeministri Ramush Haradinaj, tha se e përkrahë këtë propozim për vendosjen e këtyre masave.

Ndryshe, Qeveria e Kosovës, kishte vendosur taksë prej 10 për qind për produktet e importuara nga Serbia dhe Bosnja e Hercegovina, e cila kishte pasur efekte në rritjen e të hyrave për buxhetin e shtetit. /Telegrafi/