Austria përgatitet për ndalesën e shamisë në shkollat fillore

Qeveria austriake e ekstremit të djathtë ka parashtruar një projektligj në Parlament me të cilin synon të ndalojë mbajtjen e shamisë në shkollat fillore, ndërsa të njëjtin planifikon ta zbatojë pa mbështetjen e opozitës, raporton Anadolu Agency (AA).

Ministri i Transportit, Norber Hofer, në një konferencë për mediat pas takimit të sotëm të Këshillit të Ministrave të Austrisë, tha se qeveria ka dërguar projektligjin te partitë opozitare.

Sipas tij, nuk do të ketë negociata me opozitën para votimit, të cilës i bëri thirrje ta votojë në favor të tij.

Propozimi në fjalë, ndalon vajzat të mbajnë shami në kokë para moshës 10 vjeçare, ndërsa përveç në shkollat publike, ndalesa do të vlejë edhe për shkollat private.

Nëse miratohet ky propozim, për prindërit, fëmijët e të cilëve nuk do të respektojnë ligjin është paraparë një gjobë prej 440 euro, ose dy javë burg.

Nëse kalon në Kuvend, ligji do të hyjë në fuqi në vitin 2019. Partitë kryesore opozitare, Partia Social Demokratike (SPO) dhe Austria e Re dhe Forumi Liberal (NEOS) thanë se propozimi duhet të shqyrtohet hollësisht.

Qeveria planifikonte ta zbatojë si një dekret kushtetues me dy të tretat në Kuvend, por nga shkaku i qasjes së opozitës, është planifikuar të kalojë vetëm nga votat e partnerëve të koalicionit.

Një numër i madh gazetarësh, organizatave të shoqërisë civile, dhe komuniteti musliman në Austri ka kundërshtuar propozimin.

Austria është vendbanim i rreth 700.000 muslimanëve, shumë prej të cilëve janë shtetas austriakë të gjeneratës së dytë ose të tretë, sidomos ato të familjeve turke që migruan në vitet 1960.

Frika e cila u përhap në Austri nga kriza e refugjatëve dhe terrorizmi ndërkombëtar, bëri që partitë e krahut të djathtë të propozojnë disa masa kontroverse, përfshirë kontrolle të rrepta mbi xhamitë dhe shoqatat muslimane, përfshirë mbylljen e menjëhershme të tyre në rast të ndonjë aktiviteti të dyshimtë.

Në tetor të vitit 2017, Austria vendosi në fuqi ndalesën për mbulimin e fytyrës, e cila ndalon mbulimin e fytyrës në të gjitha vendet publike, përfshirë edhe mjetet e transportit.