Facebook rrezikon të gjobitet nga BE me 1.63 miliard dollarë

Komisioni irlandez i Mbrojtjes së të Dhënave, ka hapur një hetim formal ndaj rrjetit social Facebook, për nxjerrjen e të dhënave që ka ndikuar 50 milionë persona.

Facebook deklaroi javën e kaluar se ka zbuluar një mangësi që lejonte hakerat që të aksesojnë informacionin e thuajse 50 milionë njerëzve.

“Hetimi do të shqyrtojë respektimin e Rregullores së Përgjithshme të Mbrojtjes së të Dhënave nga Facebook, që synon sigurinë e të dhënave personale”, deklaroi Komisioni irlandez.

Sipas tyre, thuajse 10 për qind të këtyre llogarive i përkisnin Bashkimit Evropian dhe njësia evropiane e gjigantit amerikan të teknologjisë është e themeluar në Irlandë dhe rrjeti social ka zgjedhë Komisionin irlandez si rregullatorin e vetëm për çështjet e privatësisë në Bashkimin Evropian dhe për këtë Komisioni në Irlandë do të vendosë nëse do të ndërmerret një ndëshkim, përcjell Telegrafi.

Lexo po ashtu Sulmohen mbi 50 milionë llogari të Facebook

Nën rregulloren e Përgjithshme të Mbrojtjes së të Dhënave që u prezantua në muajin maj 2018, kompanitë që pësojnë shpërndarje të të dhënave personale duhet t’i raportojnë autoriteteve brenda 72 orësh, diçka që Facebook e ka bërë.

Maksimumi i gjobës për Facebook mund të arrijë në 4 për qind të xhiros botërore, që arrin në 1.63 miliard dollarë, ndërkohë që të ardhurat totale të Facebook vitin e kaluar arritën në 40.65 miliardë dollarë. /Telegrafi/