Arben Ahmeti: Thaçit po i ngutet për marrëveshje me Serbinë, shkaku i Gjykatës Speciale

Analisti Arben Ahmeti ka thënë se Vuçiqi ka komoditet të vonojë një marrëveshje, por Thaçi nuk e ka këtë komoditet.

Ai në “Debat Plus” në RTV Dukagjini ka thënë se komoditet për të pritur ka edhe Kosova por nuk Hashim Thaçi për shkak të Gjykatës Speciale.

“Thaçit i ngutet për shkak të zhvillimeve që kanë të bëjnë me Gjykatën Speciale, por nuk duhet që agjenda e një personi qoftë edhe e presidentit të Kosovës të vendoset si agjendë e Kosovës”.

Ahmeti thotë se Vuçiqi ka tri fytyra, por në BE duan ta shohin si të vetmin që mundë ta pengojë Serbinë të shkojë drejt Rusisë.

“Një pjesë e perëndimit e sheh Vuçiqin si i vetmi që mund ta ndalë Serbinë të shkoj me Rusinë”, tha ai, përcjell Telegrafi.

Raporti i Dick Marty, sipas analistit, ka qenë në tavolinë të bisedimeve, “ndërsa ne kemi pasur frikë të merremi me krimet serbe e as me dëmet e luftës”.

Analisti ka thënë se Kosova bisedon prej tetë vitesh me Serbinë, por deri tani asnjë përfitim nga Bashkimi Evropian nuk i ka ardhur Kosovës.

“Kemi dështua të ndërtojmë politikë të jashtme, e tash po shpresojmë të hyjmë në BE duke bërë marrëveshje me Vuçiqin”, deklaroi Ahmeti./Telegrafi/