Ushtria amerikane përforcon praninë ushtarake në Gjermani

Ushtria amerikane do të rritë pranin ushtarake në Gjermani me rreth 1,500 ushtarë shtesë deri në shtator të vitit 2020.

Në Gjermani tashmë ekzistojnë më shumë se 33,000 trupa amerikane dhe shtimi i pranisë së mëtejme ushtarake mund të shkaktojë tensione të reja me Rusinë, transmeton Telegrafi.

Presidenti i Rusisë, Vladimir Putin, ka thënë se forcat e NATO-s në Evropën Lindore përbënin një kërcënim për Rusinë, por zyrtarët e NATO-s i kanë heshtur poshtë akuzat.

Baza amerikane në Gjermani, tha se trupat e reja ushtarake do të vendosen në mënyrë të përhershme në Gjermani si “një provë e angazhimit tonë të vazhdueshëm ndaj NATO-s dhe vendosmërisë sonë të përbashkët për të mbështetur sigurinë evropiane”.

Kritikat e ashpra që iu bënë aleatëve të NATO-s nga Presidenti i SHBA Donald Trump kishin shkaktuar panik se Uashingtoni mund të reduktojë shpenzimet e mbrojtjes në Evropë dhe të zvogëlojë praninë e saj ushtarake.

“Shtimi i këtyre forcave ushtarake rrit gatishmërinë e Ushtrisë Amerikane në Evropë dhe siguron që ne jemi më të aftë për t’iu përgjigjur çdo krize”, thuhet ndër të tjera në njoftimin e bazës amerikane.

Megjithatë, trupat amerikane do të jenë ende në numër shumë më të pakët se ato që ishin gjatë Luftës së Ftohtë.

Ushtria amerikane tha se do të fillojë aktivizimin e njësive të reja ushtarake në disa baza në Gjermani gjatë këtij viti, duke përfshirë një shtab të fushës së artilerisë, dy batalione të shumëfishta të raketave dhe një batalion mbrojtës ajrore me rreze të shkurtër veprimi.

Richard Grenell, ambasador i SHBA në Gjermani, tha se vendimi për shtimin e trupave tregon angazhimin e Uashingtonit për të forcuar aleancën e NATO-s, ndërkohë që rritjet e planifikuara të shpenzimeve ushtarake kanë përmirësuar sigurinë.

Ministrja gjermane e Mbrojtjes, Ursula von der Leyen, ka përshëndetur vendimin e SHBA-ve për shtimin e trupave në Gjermani.

“Vendimi i SHBA për të rritur praninë ushtarake në Gjermani është një shenjë që tregon se marrëdhëniet transatlantike janë të forta dhe ky është një angazhim për sigurinë tonë të përbashkët”, tha ajo.

Ursula von der Leyen është një konservatore që ka kërkuar nga Merkel rritje të shpenzimeve ushtarake, ndërkohë që partnerët e koalicionit janë kundër shtimit të shpenzimeve ushtarake./Telegrafi/