Nagavci: Qeveria nuk e ka as minimumin numrave, vendi të shkojë në zgjedhje

Deputetja nga radhët e Lëvizjes Vetëvendosje, Arbërie Nagavci, ka thënë që vendit i duhen zgjedhje të reja.

“Zgjidhja më e mirë janë zgjedhjet. Kjo Qeveri që ka minimumin e numrave nuk e ka as minimumin e nevojshëm të marrjes së vendimeve dhe në mënyrë joprofesionale po mundohet të shtyjë përpara çështje dhe të krijojë një pamje të rrejshme edhe për opinionin që ne po funksionojmë. Qytetarët me anë të zgjedhjeve do të vendosin për deputetë të përgjegjshëm, sepse në radhë të parë kemi obligim ndaj qytetarëve”, ka thënë Nagavci për gazetën Zëri.

Përveç kësaj, ajo ka arsyetuar bojkotimin e seancave nga Grupi Parlamentar i Lëvizjes Vetëvendosje, duke thënë që këtë po e bëjnë për interesin e qytetarëve.

“Si Lëvizje Vetëvendosje ne kemi qenë të rregullt nëpër seanca, shumica e deputetëve kanë qenë aty. Por, ka pasur momente që për shkak të qëndrimeve tona politike të pamundësojmë shtyrjen përpara të agjendave, të cilat nuk janë në interes të vendit, kemi pasur raste kur kemi vendosur që të mos marrim pjesë në votim, gjë që është legjitime”, ka thënë më tutje Nagavci.