Menaxhmenti i Postës së Kosovës përkrah kërkesat e punëtorëve

Menaxhmenti i Postës së Kosovës po përcjellë me vëmendje dhe me shqetësim grevën e organizuar nga sindikatat dhe punëtorët e kësaj ndërmarrje.

Menaxhmenti thotë se ka paralajmëruar në muajin mars të këtij viti se nuk do të ketë mundësi të bëjë ekzekutimin e pagave të punonjësve dhe as të paguajë shpenzimet operative të ndërmarrjes, nëse Qeveria nuk e kryen obligimin ligjor që ka ndaj ndërmarrjes për mbulimin e humbjeve në shërbimin universal postar.

“Për shkak te mosmbulimit të Shërbimit Universal Postar, ne jemi detyruar që për disa muaj radhazi të bëjmë ekzekutimin e pagave në dy pjesë. Iu kemi dhënë prioritet gradave nga 1-5 ndërsa nga grada 5-17 pagat janë paguar me vonesë. Gjithashtu, kemi pasur probleme në pagesat e TVSH-së ndaj ATK-së dhe tani nga kjo e fundit kemi paralajmërime për bllokim të llogarive tona bankare. Posta ka krijuar dhjetëra shërbime të reja në ndërmarrje duke ngritur vlerën e kompanisë, por as këto shërbime nuk kanë qenë të mjaftueshme për të mbuluar humbjen që na është shkaktuar nga Shërbimi Universal Postar. Kemi bërë shkurtime drastike të shpenzimeve operative deri në rrezikimin e operimit normal të ndërmarrjes. Tani kërkesat e Sindikatave dhe punonjësve të Postes i konsiderojmë të drejta dhe të ligjshme përmes realizimit të të cilave ne do te bëhemi ndërmarrje stabile e vet qëndrueshme në aspektin financiar si dhe do të m arrim përsipër edhe shërbime të reja në ndërmarrje. Si menaxhment i ndërmarrjes lusim Qeverinë e Kosovës që sa më shpejt të merret me kërkesat e ndërmarrjes sepse çdo ditë vonesë do të jetë me pasoja shumë të rënda për ne, ndërmarrjen dhe imazhin e saj në përgjithësi”, thuhet në komunikatën e Postës, përcjell Telegrafi.

Lexo po ashtu Punëtorët e Postës në grevë

Kujtojmë se punëtorët e Postës së Kosovës sot do të mbajnë grevë ku sipas njoftimit nga Sindikata e Punëtorëve, do të mbyllen nga ora 08:00 deri 21:00 të gjitha zyrat postare në Kosovë.

Në fund, menaxhmenti iu ka kërkuar falje të gjithë konsumatorëve për këto shqetësime por këtë situatë thonë se e kanë paralajmëruar kohë më parë përmes shkresave zyrtare dhe prononcimeve publike. /Telegrafi/