Haradinaj: Presioni i Beogradit ndaj pjesëtarëve serbë të FSK-së, i papranueshëm dhe i dalë kohe

Kryeministri i vendit, Ramush Haradinaj sot pas mbledhjes së Këshillit të Sigurisë ka folur rreth presionit të Beogradit ndaj pjesëtarëve serbë të Forcës së Sigurisë.

Ai tha se mbledhjen e Këshillit të Sigurisë e ka thirrur pikërisht për këtë çështje, pas disa kërkesave për lirim nga detyra nga pjesëtarët serbë të FSK-së.

Kryeministri i vendit tha se në kërkesën për lirim nga pjesëtarët serbë të FSK-së theksohet presioni direkt nga Beogradi zyrtar gjatë lëvizjeve të tyre në Serbi dhe mënyra tjera të kërcënimit.

Lexo po ashtu Tetë pjesëtarë serbë kërkojnë demobilizm nga FSK-ja, shkaku i presionit nga Beogradi

Ai tha se Kosova pas këtyre ngjarje ka shqyrtuar nivelin e sigurisë në vend dhe nga takimi sipas tij del që këto ngjarje nuk rezultojnë me prishjen e rendit dhe të sigurisë në vend.

Haradinaj theksoi se në takim  po ashtu kanë folur rreth veprimeve të nevojshme të Kosovës.

Lexo po ashtu Ramadani: I papranueshëm presioni i Serbisë ndaj pjesëtarëve serbë të FSK-së

“Ne si Kosovë kemi vepruar me kohë si në planin e brendshëm, ashtu edhe të jashtëm dhe kemi kërkuar të sqarohet ky veprim i papranueshëm”, tha Haradinaj, duke shtuar se të gjitha institucionet janë në nivel të punës lidhur me këtë situatë të krijuar.

Kreu i ekzekutivit të vendit tha se serbët e Kosovës janë qytetarë të barabartë në Kosovë dhe marrin pjesë në jetën politike e shoqërore.

“Ky presion i Beogradit është i pakuptimtë dhe i dalë kohe”, tha Haradinaj.

Ai tha se janë të habitur me këtë qasje të Beogradit, që është e padrejtë dhe është krim ndaj qytetarëve serbë të Kosovës, ndaj familjeve të tyre, është kundër të drejtave të njeriut dhe kundër sigurisë së tyre. /Telegrafi/