Të dhunuarat e luftës po kërcënohen që të mos aplikojnë për pension

Ende nuk flasin për dhunimin që iu ka ndodhur gjatë luftës, ngase familja i paragjykon. Ndërkohë ka nga ato që familja i kërcënon të mos e tregojnë të vërtetën. Ndërkohë asnjë dhunues nuk është dënuar ende.

Këto janë problemet me të cilat ende ballafaqohen të mbijetuarat e dhunës seksuale gjatë luftës së fundit në Kosovë.

“Gruaja e Guximshme”, çmim që mori nga Departamenti Amerikan i Shtetit, e që është edhe drejtoreshë e Qendrës Kosovare për Rehabilitimin e të Mbijetuarave të Torturës (QKRMT), Feride Rushiti thotë se është e domosdoshme të vihet drejtësi për gratë dhe burrat e dhunuar.

Për të pasur qetësi shpirtërore viktimat e dhunës seksuale gjatë luftës, Rushiti thotë se është i domosdoshëm ndëshkimi i kryesve të këtij krimi.

Sipas saj, arsyeja pse zgjodhi që të merret me të drejtat e kësaj kategorie ishte krijimi i një ambienti të sigurt për gratë dhe burrat që përjetuan këtë lloj dhune gjatë luftës.

Duke ia dedikuar këtë çmim të gjitha viktimave të dhunës seksuale, ajo shpjegon se me këtë çmim është vu në nivelin ndërkombëtar agjenda e grave të dhunuara gjatë luftës në Kosovë.