Zhvillimi i politikave fiskale synon lehtësimin e të bërit biznes

Funksionalizimi i ekonomisë së tregut si dhe reformat në politikat fiskale të vendit janë të domosdoshme për lehtësimin e mëtejmë të të bërit biznes por edhe për fuqizimin e sektorit privat në Kosovë. Kjo u tha gjatë një takimi të ministrit të Financave, Bedri Hamza, me drejtuesit e kompanive anëtare të Odës Ekonomike Amerikane në Kosovë (OEAK).

Drejtori ekzekutiv i OEAK, Arian Zeka, shprehu gatishmërinë e Odës për të kontribuar me rekomandime për procesin e plotësim-ndryshimit të legjislacionit tatimor. Ai shprehu shqetësimet e Odës Amerikane për sa i përket menaxhimit të parasë publike, veçanërisht disa vendimeve të cilat mund të çojnë në rritjen e ngarkesës fiskale për bizneset, përcjell Telegrafi.

Ndërsa, zëvendëspresidenti i Bordit të Guvernatorëve të OEAK-ut, Hakif Gashi, tha se krijimi i një ambienti të mirë për bizneset reflekton në rritjen e vendeve të punës dhe rritje ekonomike të vendit. Ai shtoi si primare zhvillimin e politikave të mirëfillta fiskale në tërheqjen e investitorëve të huaj në Kosovë, por edhe zgjerimin e kompanive kosovare në rajon.

Ministëri i Financave, Bedri Hamza sqaroi se rrezikimi i stabilitetit makrofiskal në Kosovë mund të krijojë probleme si në sektorin publik ashtu edhe në atë privat. Ai tha se synim i Ministrisë së Financave vazhdon të mbetet përkrahja e sektorit privat në lehtësimin e eksportimit të produkteve në tregun rajonal duke u shprehur se ky ka qene edhe qëllimi i masave fiskale të zbatuara nga ana e Ministrisë së Financave për lirime doganore dhe shkurtim të procedurave doganore. Hamza njoftoi se MF është duke punuar në ndryshimin e legjislacionit tatimor në përputhje me direktivat e BE-së.

Bizneset e pranishme në takim thanë se Ministria e Financave ka krijuar lehtësira fiskale me ndikim të dukshëm në fuqizimin e tyre, por edhe në qartësimin dhe aplikimin e drejt të legjislacionit tatimor. /Telegrafi/