Arta Rama-Hajrizi, rizgjidhet edhe për një mandat në krye të Gjykatës Kushtetuese

Arta Rama-Hajrizi, sapo është rizgjedhur kryetare e Gjykatës Kushtetuese të Kosovës, edhe për një mandat të dytë trevjeçar, shkruan Telegrafi.

Ajo para se të zgjidhej kryetare e kësaj gjykate në mandatin e parë, ka shërbyer për një kohë të gjatë si anëtare e grupit punues të Gjykatës Kushtetuese të Kosovës.

Gjithashtu ajo ka punuar se asistente në Fakultetin Juridik të Universitetit të Prishtinës ku dhe i ka përfunduar studimet e larta.

Hajrizi ka përfunduar Magjistraturën për drejtësi dhe qeverisje në “Washington College of Law, American University” në Washington DC.

Arta Rama-Hajrizi në vitin 2012 ka shërbyer si gjyqtare në Gjykatën Kushtetuese. Ajo më 12 shtator 2014 është emëruar zëvendës-anëtare e Komisionit të Venecias ku ka përfaqësuar Kosovën.

Njihet edhe si themeluese e Konsullatës së përgjithshme të Republikës së Kosovës në Nju Jork në të cilën shërbeu gjatë viteve 2008-2012. Kryetarja e Gjykatës Kushtetuese ka qenë pjesë e Ekipit të ekspertëve në Komisionin për hartimin e Kushtetutës së Republikës së Kosovës.

Arta Rama-Hajrizi, ka punuar në disa projekte të USAID-it në Kosovë për reformimin e sistemit të drejtësisë dhe të atij gjyqësor.

Ajo njihet si eksperte në zbatimin e shumë projekteve në ngritjen e vetëdijesimit për respektimin dhe për mbrojtjen e të drejtave të njeriut.

Aktualisht është në përfundim të doktoraturës në Universitetin e Prishtinës, është e martuar dhe ka dy fëmijë./Telegrafi/