Samiti mes dy Koreve, tregohet edhe ushqimi që do t’i shërbehet Kim Jong Un-it nga Koreja e Jugut

Koreja e Jugut ka zbuluar menynë që do të shërbehet në darkë pas samitit të parë midis udhëheqësit të Koresë së Veriut, Kim Jong Un dhe Presidentit të Koresë së Jugut, Moon-Jae-in të premten.

Sipas mediave të huaja, përcjell Telegrafi, Koreja e Veriut dhe Koreja e Jugut kanë përfunduar përgatitjet për takimin e liderëve të tyre në Shtëpinë e Paqes në anën jugore të fshatit Panmunjom deri në detajin më të vogël, duke përfshirë kohën e shtrëngimit të tyre të parë të duarve.

Gjithashtu, siç thuhet më tej, edhe darka midis dy udhëheqësve është përgatitur me vëmendje për të pasqyruar domethënien historike të takimit.

“Kjo meny është përzgjedhur për të nderuar ata që janë përpjekur për të arritur paqen dhe bashkimin në Gadishullin Korean gjatë viteve të fundit”, ka thënë zëdhënësi presidencial i Koresë së Jugut, Kim Eui-kyeom në një konferencë shtypi.

Ndërkohë detajet e menysë janë publikuar të martën në një faqe interneti të qeverisë së Koresë së Jugut, e lansuar javën e kaluar, kushtuar tërësisht për mbulimin e samitit ndër-korean, të cilit iu dha slogani “Paqe, një fillim i ri”.

Po sipas mediave, përderisa presidentit jugor do t’i shërbehet peshk, për t’i kujtuar fëmijërinë e tij, pasi ishte rritur në qytetin bregdetar Busan, atij verior do t’i shërbehet një lloj specialiteti zviceran të njohur si “Rosti” për t’i kujtuar “kohën e shkollimit të tij në Zvicër”.

Pjatat tjera, ndërkaq janë të lidhura me njerëz dhe vende që kanë kontribuar në procesin e paqes ndër-koreane.

Samiti në fjalë pritet që pikë kryesore të diskutimeve të ketë negociatat për programin bërthamor të Koresë së Veriut. /Telegrafi/