Meridian Express përkrahë aktivitetin e komunës për Ditën e Tokës

Meridian Express e ka mbështetur aktivitetin e Komunës së Prishtinës për pastrimin e lagjeve, fshatrave dhe qytetit me 50 vullnetarë dhe dhjetëra fidane të reja të mbjellura.

Rrjeti më i madh i marketeve në Kosovë, Meridian Express sot ka njoftuar se i është bashkëngjitur aktiviteteve të Komunës së Prishtinës për pastrimin e ambientit dhe mbjelljes së fidaneve të reja në lagje të ndryshme të qytetit. Përveç mbështetjes zyrtare të aktiviteteve, 50 punëtorë të Meridian Express i janë bashkëngjitur aktiviteteve për Ditën e Tokës.

“Në fillim të çdo pranvere të re, Meridian Express organizon Ditët e Pastrimit – me fokus për pastërtinë dhe ambientin, ndërsa këtë vit ne i jemi bashkëngjitur aktiviteteve të shumta komunale të organizuara për Ditën e Tokës në Prishtinë, për të dhënë kontributin tonë për rrethinën dhe komunitetin lokal. Sot, ne i jemi bashkangjitë Komunës me 50 vullnetarë dhe 35 fidane të reja të mbjellura, në simbolikë të 35 marketeve që Meridian i ka në qytetet e ndryshme të Kosovës” ka thënë Yllka Mustafa Vejsa, menaxhere e marketingut në Meridian Express.

Këtë vit, Komuna e Prishtinës ka organizuar aktivitetin e quajtur “Bëhu edhe ti mik i Tokës” në të cilin kanë marrë pjesë edhe biznese dhe organizata të tjera, të cilat i janë bashkëngjitur komunës për pastrimin e qytetit dhe mbjelljen e drunjëve, mes tjerash.

Për çdo vit, menaxhmenti dhe stafi i Meridian Express organizon dhe mbështet ngjarje dhe aktivitete të shumta që për qëllim kanë ruajtjen dhe qëndrueshmërinë e ambientit dhe natyrës, ndërsa Meridian Express zotohet të mbështesë ngjarje të tjera të kësaj natyre edhe në të ardhmen.