“Më vjen keq” – Salah i kërkoi falje portierit të Watfordit për katër golat që ia shënoi

Mohamed Salah ka treguar edhe anën e butë të personalitetit të tij duke i kërkuar falje portierit të Watfordit, Orestis Karnezis, për katër golat që ia shënoi në ndeshjen e të shtunës në Anfield.

Liverpooli fitoi me rezultat 5-0 para tifozëve të vet, ndërsa egjiptiani ishte ylli i ndeshjes – duke shënuar katër gola dhe e dhuroi asistimin për golin e Roberto Firminon.

Në këtë mënyrë, ai e ka rritur diferencën me Harry Kane si golashënuesi më i mirë në Ligën Premier (me 28 gola të shënuar deri më tani në kampionatin anglez).

Lexo po ashtu Të gjitha lajmet për MOHAMED SALAH

Megjithatë, 25-vjeçari nuk harroi ta ngushëllonte portierin kundërshtar, të cilit madje i kërkoi falje që ia shënoi të gjithë ata gola.

“Më vjen keq”, ishin fjalët e Salah derisa e përshëndeste Karnezisin, të cilit i ka shënuar gola edhe gjatë kohës sa ishte lojtar i Romës (ndërsa greku luante te Udinese).

Mo Salah APOLOGISED to the Watford keeper after sticking four past him.

The nicest guy in football 👏 pic.twitter.com/YaHAjGgTEi

— Football on TNT Sports (@footballontnt) March 17, 2018

Salah ka shënuar 36 gola në të gjitha garat këtë sezon duke e thyer rekordin e Fernando Torresit, si lojtari i Liverpoolit që ka shënuar më së shumti gola në sezonin debutues.

Liverpooli është në vend të tretë në tabelë në kërkim të një pozitë që dërgon në Ligën e Kampionëve në sezonin e ardhshëm.

Po ashtu, këtë edicion luan në çerekfinale të garës më të madhe evropiane për klube, ku për kundërshtar e ka rivalin nga kampionati anglez, Manchester City. /Telegrafi/