Dhuna në futbollin grek, presidenti i PAOK-ut hyri në fushë me armë për t’u konfrontuar me gjyqtarin

Mediat kryesore botërore kanë raportuar për veprimin agresiv të presidentit të PAOK-ut në ndeshjen kundër AEK Athens që u zhvillua të dielën.

Ndeshja në Superligën greke u ndërpre për shkak se Ivan Savvidis hyri në fushë për t’u konfrontuar me gjyqtarin e takimit.

Në minutën e 89-të, gjyqtari e anuloi një gol të PAOK-ut për shkak të pozitës jashtë lojë dhe kjo gjë nuk i pëlqeu kreut të klubit.

Sipas BBC, ai hyri në fushë duke shkuar në drejtim të gjyqtarit, shumë i nevrikosur, ndërkohë që me vete kishte edhe armë.

Presidenti i PAOK-ut u kishte kërkuar lojtarëve të tij që ta lëshonin fushën, sepse nuk i pëlqente vendimi i gjyqtarëve, ndërsa truprojat mundoheshin që ta qetësojnë.

Pas këtij veprimi, lojtarët e AEK-ut u larguan nga fusha nga frika për sigurinë e tyre dhe nuk u kthyen më. Dy orë më vonë, ndeshja u ndërpre zyrtarisht.

https://twitter.com/FootballPersian/status/972970244275924994

Savvides, i cili ka lindur në Gjeorgji, është me origjinë greke dhe është një biznesmen dhe politikan i njohur.

Ai ka qenë pjesëtar i Parlamentit rus dhe ka lidhje të afërta me presidentin e Rusisë, Vladimir Putin. /Telegrafi/