Zaev: Jemi të gatshëm për një përcaktim gjeografik të emrit të Maqedonisë (Video)

Kryeministri Zoran Zaev dhe ambasadori i BE-së, Samuel Zhbogar, kanë mbajtur një konferencë shtypi pas publikimit të strategjisë së Komisionit Evropian (KE) për Ballkanin Perëndimor, ku mendohet që Maqedonia të nisë bisedimet për anëtarsim.

Zhbogar tha se BE-ja është dhuruesi më i madh i mjeteve financiare në rajon, kurse Ballkani Perëndimor, ashtu siç është sot, nuk është i gatshëm për anëtarësim, pasi që duhen shumë reforma, me një kusht që liderët të marrin veprime, që deri më 2025 disa prej tyre të bëhen anëtare të BE-së.

Ai theksoi se ka ardhur në qeveri që t’i shqyrtojnë gjashtë pikat e strategjisë, dhe të ndërmarrin masa për këto pika.

Zhbogar premtoi fonde për rritjen e cilësisë së arsimit, respektivisht të mësimdhënësve në të gjitha sferat arsimore në vend, duke shtuar se me padurim pret muajt në vijim për të zbatuar strategjinë e KE-së.

Zaev tha se lajm i mirë nga Brukseli erdhi. Maqedonia sot fitoi mirënjohje për përparim në zgjedhjen e saj strategjike. Sipas tij strategjia për zgjerim përmend që Maqedonia ka përparuar në rrugën evropiane, dhe se KE-ja është e gatshme të rekomandojë fillimin e bisedimeve.

Kryeministri sqaroi në bazë të përparimit real, shtetet mund të ecin përpara drejt bashkimit me shtetet që tashmë janë në bisedime, pra me Serbinë dhe Malin e Zi.

Për Zaevin, ky sukses është i të gjithëve që jetojnë në Maqedoni dhe jo vetëm i një personi. Ai u bëri thirrje të gjithëve, kryetarit të shtetit, dhe opozitës që të punohet drejt realizimit të reformave dhe anëtarësimit, duke shtuar se përfitimet do t’i gëzojnë qytetarët e Maqedonisë.

Zaev theksoi se para anëtarësimit na pret zgjidhja e çështjeve të hapura me fqinjët, përndryshe nuk ka anëtarësim.

Në lidhje me emrin, Zaev shpalosi një detaj rreth çështjes së emrit, duke shtuar se Maqedonia është e gatshme për një marrëveshje me përcaktim gjeografik, për të zgjidhur çështjen e emrit.

Zaev konfirmoi se autostrada e koridorit 10 do të quhet Autostrada Miqësia, kurse aeroporti i Shkupit do të gjuhet “Aeroporti Ndërkombëtar Shkupi”./Telegrafi/