Lëvizja Besa reagon ndaj mospërfilljes nga ana e Qeverisë për takimin e liderëve

Partia opozitare Lëvizja Besa nëpërmjet një kumtese me shkrim ka shprehur pakënaqësinë e saj për shkak të anashkalimit të tyre nga partitë e Qeverisë së Maqedonisë në lidhje me takimin e caktuar sot ndërmjet kreut qeveritar dhe partisë opozitare maqedonase, përcjell Telegrafi Maqedoni.

Takimi i sotëm mes kryeministrit, kryetarit të shtetit dhe kryetarëve të BDI-së dhe OBRM-PDUKM-së është edhe një mospërfillje e shumicës të vullnetit të shqiptarëve në Maqedoni, thuhet në reagimin e Lëvizjes Besa.

Duke qenë të përkushtuar dhe konstruktiv në procesin e negociatave që po zhvillohen rreth emrit të shtetit mes Maqedonisë dhe Greqisë, ne ndjehemi të indinjuar që shumica e shqiptarëve që sot nuk përfaqësohen nga BDI janë lënë jashtë tryezës për të informuar rreth procesit të negociatave për çështjen e emrit.

Është e pakuptueshme qasja e këtyre protagonistëve që po eliminojnë zërin e opozitës duke mos e ftuar partinë më të madhe opozitare të shqiptarëve në Maqedoni, pra Lëvizjen Besa në një takim me një rëndësi kaq të madhe për të ardhmen e shtetit.

Prandaj, duke u nisur nga ky fakt, i bëjmë thirje kreut shtetëror, që urgjentisht të ndryshojë qasjen e saj selektive ndaj proceseve kaq të rëndësishme politike për të ardhmen e vendit, dhe të konsiderojë votat e opozitës shqiptare si përfaqësues legjitim të shumicës të shqiptarëve në Maqedoni duke i respektuar dhe bashkëbiseduar çështjet që kanë të bëjnë me të ardhmen e vendit, theksojnë nga Lëvizja Besa, thuhet në kumtesën e kësaj partie./Telegrafi/