Në Gjimnazin e Tetovës u bojkotuan orët e para mësimore, nuk janë paguar profesorët

Dhjetëra profesorë të Gjimnazit të Tetovës “Kirill” Pejçinoviq në shenjë proteste për vonesën e rrogës së dhjetorit kanë bojkotuar orët e parë të mësimit. Udhëheqësia e shkollës mbështet protestën e profesorëve dhe apelon deri tek autoritetet kompetente që të ndërmarrin masa për zgjidhjen e kësaj çështjeje.

“Ligji për pagesën e rrogave e dimë që ka një afat se deri kur duhet të paguhen. Kuptohet se edhe profesorët kanë të drejtë sepse një pjesë e madhe janë raste që do i quaja edhe sociale me borxhe me kredi nëpër banka dhe bankat nuk falin ata kërkojnë që të paguash këstin”, deklaroi përgjegjësi i profesorëve, Daut Arifi.

Nga komuna e Tetovës fajin për vonesën e rrogës ia hedhin Ministrisë së Financave.

“Qeveria nesër në rend dite do ketë këtë pikë të rendit të ditës që është leximi i buxhetit të këshillit të Tetovës, që nënkupton që brenda javës me këtë lexim dhe besojmë që rrogat do jenë çështje rrjedhëse ashtu siç kanë qenë deri më tani”, tha Armend Fazliu, zëdhënës i komunës së Tetovës.

Bojkoti ditën e sotme ka ndodhur vetëm në Gjimnazin “Kiril Pejçinoviq” të Tetovës, ndërkohë në rast se nuk lëshohen mjetet së shpejti, atëherë revolta do të zgjerohet edhe në shkollat e tjera të Tetovës. Ndërkohë Alsat mëson se mjetet nuk janë lëshuar edhe për një numër të madh të shkollave të mesme të Vashkisë së Shkupit./Alsat-M/