Walker: Është koha që klasa politike e dalë nga lufta, të largohet

Miku i madh i shqiptarëve e diplomati amerikan, William Walker, është shprehur i zhgënjyer me gjendjen aktuale në Kosovë.

Walker vlerësoi që gjërat nuk janë duke ndryshuar përderisa theksoi nevojën për një gjeneratë të re të udhëheqësve politik.

“Aktualisht klasa politike që udhëheq vendin ka dalë nga lufta, përderisa tani është koha që ky shtet të ketë një gjeneratë të re të udhëheqësve politik.  Të gjithë theksojnë se dëshirojnë ndryshimin, por unë ndryshimin nuk po e shoh” deklaroi Walker në një intervistë në Info Magazine të Klan Kosovës.

Walker theksoi që duke u bazuar edhe në eksperiencat e vendeve të ndryshme, udhëheqësia e dalë nga lufta ka tendencë që të mos jetë adekuate për një mandat të gjatë.

Si alternativë për Walker është Lëvizja Vetëvendosje.

Walker, ka treguar se a ishte i vërtetë lajmi që ka refuzuar të dekorohet nga presidenti aktual i Kosovës, Hashim Thaçi.

Walker ka sqaruar se si ka qenë puna.

“Nuk është që kam refuzuar, por më është kërkuar nëse do të pranoja dhe për disa arsye kam thënë jo, për momentin jo, nuk jam i gatshëm të pranojë një dekorim nga Thaçi. Kemi dallime unë dhe ai”.

Dallimet me Thaçin Walker ka thënë se i ka edhe sa i përket dëgjueshmërisë së madhe që Thaçi ka treguar ndaj ndërkombëtarëve.

“Komuniteti ndërkombëtarë sipas mendimit tim ka bërë shumë gabime këtu dhe ai e ka dëgjuar shumë. Për shembull kushtetua nuk është e shkruar mirë, mendoj që duhet të ndryshohet”.

“Por, ka edhe arsye të tjera. Pra, nuk e kam refuzuar medaljen, por jam pyetur nëse do ta pranoja dhe kam thënë se për momentin jo”, tha ai.

Diplomati veteran amerikan dhe miku i madh i shqiptarëve, William Walker, është rikthyer në Kosovë, në 19 vjetorin e masakrës së Reçakut, masakër që botës ia shfaqi pikërisht Walker, duke i thënë komunitetit ndërkombëtar se në Kosovë po kryhet gjenocid./Klan Kosova/