Dimitrov: Ambasadat e RM-së të jenë më të hapura ndaj qytetarëve të saj

Përfaqësuesit e Forumit për Maqedoni demokratike, Bllazhe Dimov, Aneta Georgievska-Shajn, Maja Panova dhe Haris Fazliu u takuan me ministrin për punë të jashtme, Nikolla Dimitrov.

Në pyetjen se në çfarë mënyre Forumi mundet në mënyrë më të dobishme të angazhohet për t’i ndihmuar Maqedonisë, Dimitrov tha se vetë fakti që Forumi për Maqedoni demokratike është formuar si organizatë apartiake dhe qytetare i reflekton edhe synimet e Maqedonisë në këtë fazë të zhvillimit të demokracisë së saj. Dimitrov shtoi se në moment Ministria për punë të jashtme punon në përmirësimin e imazhit të Maqedonisë si dhe përmirësimin e marrëdhënieve me shtete tjera, ndërsa diaspora e Maqedonisë me siguri që mund të ndihmojë në këtë drejtim.

Nga Forumi për Maqedoni demokratike vlerësojnë se është i nevojshëm thellimi i marrëdhënieve ndërmjet shtetasve të Maqedonisë që jetojnë jashtë vendit dhe përfaqësitë diplomatike konsulare dhe u sugjerua që ambasadat dhe konsulatet të bëjnë hap më serioz në drejtim të hapjes së dyerve të këtyre përfaqësive për ngjarje që do t’i kishin organizuar përfaqësuesit e diasporës së Maqedonisë./Telegrafi/