Fungo: KFOR-i do të jetë këtu deri sa institucionet e Kosovës të ofrojnë më shumë siguri

Prezenca e KFOR-it në Kosovë, nuk është e lidhur me ndonjë periudhë të caktuar kohore. KFOR do të jetë këtu derisa institucionet e vendit do të jenë në gjendje të ofrojnë më shumë siguri. Kështu tha komandanti i KFOR-it, gjeneral major Giovanni Fungo, në një konferencë për media, në prag të largimit të tij nga Kosova.

“Kushtet janë që institucionet e Kosovës të jenë në gjendje të ofrojnë sa më shumë siguri. Për momentin siguria është e ndarë në tri nivele. Reaguesit e parë i kemi policinë e Kosovës, vija e dytë janë EULEX dhe agjencitë për respektim të ligjit dhe reaguesit e tretë janë KFOR-i”, tha ai.

Ndërsa tha se situata e sigurisë në Kosovë, është mjaft e mirë.

“Edhe lufta kundër luftëtarëve të huaj ka qenë mjaftë efikase. Dhe kemi një bashkëpunim të shkëlqyer me policinë e Kosovës, FSK-në dhe EULEX-in”, tha ai.

Fungo po ashtu foli dhe për ushtrimet e përbashkëta me policinë e Kosovës dhe FSK-në, për të cilët tha se janë të të njëjtit standard me ushtarët e tyre.

Ai tha se KFOR edhe gjatë zgjedhjeve të fundit, ka zbarkuar asete të ndryshme, për të ruajtur një ambient të sigurt.

Ndërsa tha se kanë shumë sfida përpara dhe se KFOR vazhdimisht bënë përpjekje, që t’i adresojë të gjitha sfidat që do t’i vijnë në të ardhmen dhe se do të vazhdoj të mbetet këtu, për të ofruar një ambient të sigurt. /kp/Telegrafi/